सुनसरीको बराहक्षेत्रमा माटोको ढिस्कोले पुरिएर दाजुको मृत्यु, भाइ घाइते

इटहरी (डेस्क) : सुनसरीको बराहक्षेत्र नगरपालिका ८ का १४ बर्षीय प्रज्वल राईको बालुवा र माटोको ढिस्कोले पुरिएर मृत्यु भएको छ ।

आज दिउँसो करीब १ बजे बराहक्षेत्र ८ सालबन्दी स्थित कोशी नदिको किनारमा रहेको पानी जमेको भौडीको डिलमा खेल्ने क्रममा उनको पुरिएर मृत्यु भएको हो ।

उनको तत्काल उपचारार्थ बराहक्षेत्र नगर अस्पतालमा लगिएको र उपचारको क्रममा उनको मृत्यु भएको ईलाका प्रहरी कार्यालय महेन्द्रनगरले जनाएको छ ।

उनीसंगै खेल्न गएका उनकै भाई १० बर्षीय राजन राई समेत पुरिएर घाइते भएकोमा उनलाई थप उपचारको लागि धरानस्थित वीपी प्रतिष्ठान लगिएको प्रहरीले जनाएको छ ।