धरान : उद्यमशील महिला संघ सुनसरीले आफ्नो तेस्रो वार्षिक साधारणसभा मनाएको छ । शनिबार धरानस्थित रेडक्रसको सभाहलमा साधारणसभा सँगै ब्याग तालिमको समापन कार्यक्रम आयोजना गरेको हो ।
उद्यम क्षेत्रमा क्रियाशील महिलाहरुको पेशागत हकहितको पक्षमा संगठित पहलका साथै महिलाहरुलाई आर्थिक रुपमा सबल, सक्षम दक्ष र आत्मनिर्भर बनाउने उदेश्यले नेपाल उद्यमशील महिला संघको आयोजना र धरान उपमहानगरपालिकाको सहयोगमा १५ दिने थाकल ब्याग बनाउने तालिम आयोजना भएको थियो ।
कार्यक्रमका प्रमुख अतिथि १ नं. प्रदेशका भूमि ब्यवस्था कृषि तथा सहकारीमन्त्री रामबहादुर मगरले वर्तमान समयमा प्राकृतिक कच्चा पदार्थहरुको पहिचान गरि त्यसलाई सदुपयोग गर्नुपर्नेमा जोड दिएका थिए । उनले आयातित वस्तुहरुमा मात्रै निर्भर हुन नहुने बताएका थिए ।
कार्यक्रममा धरान उपमहानगरपालिकाकी उपमेयर मन्जु भण्डारी सुवेदीले उद्यमी महिलाहरुको लागि हाल राज्यले बैँकमार्फत २ प्रतिशत ब्याजदरमा ऋण प्रभाह गरिरहेको उदृत गर्दै महिलाहरुले जुनसुकै काम गर्न पनि हिम्मत गर्नुपर्ने बताइन् ।
कार्यक्रममा वार्षिक प्रगति प्रतिवेदन उद्यमशील महिला संघ सुनसरीकी महासचिव रञ्जु सिग्देलले प्रस्तुत गरेकी थिईन् ।
महिला संघकी द्वितीय उपाध्यक्ष सृजना भट्टराई, थाकल ब्याग तालिमकी प्रशिक्षक चन्द्रावती चौधरी, तालिममा सहभागी सृजना नेपाल, उद्यमशील इनरुवा नगर समितिकी अध्यक्ष मनु चापागाईँ, इटहरीकी सुशीला कार्की तथा जामुनखाडी पर्यटन विकास समितिका अध्यक्ष खेमराज सिटौलाले बोलेका थिए ।
तालिमकी प्रशिक्षक चन्द्रावती चौधरी तथा नेपाल पर्यटन बोर्डका कार्यकारिणी सदस्य कृष्ण शाहलाई सम्मान समेत गरिएको थियो ।
महिला संघकी अध्यक्ष यशोधा कायस्थको सभाध्यक्षमा उक्त कार्यक्रम सम्पन्न भएको थियो ।
तस्वीरहरु : लक्ष्मण थापा । धरान ।
Discussion about this post