इटहरी : जिल्ला प्रशासन कार्यालय सुनसरीले जारी गरेको निषेधाज्ञाको उल्लंघन गर्दै व्यवसाय सञ्चालन गर्ने ४५ जना व्यापारीहरुलाई इटहरी प्रहरीले नियन्त्रणमा लिएको छ ।
आइतबार निषेधाज्ञाको उल्लंघन गरेर व्यवसाय सञ्चालन गरेका ४५ जना व्यापारीहरुलाई पक्राउ गरी सचेत गराइएको इलाका प्रहरी कार्यालय इटहरीका प्रहरी नायव उपरीक्षक (डीएसपी) अर्जुन केसीले जानकारी दिए ।
‘प्रहरी देख्नासाथ सटर झार्ने र प्रहरी हिँडेपछि सटर खोलेर पसल सञ्चालन गर्ने ४५ जनालाई आज नियन्त्रणमा लिएर सचेत गराएका छौँ,’ डीएसपी केसीले टाकुरासँग भने, ‘प्रशासनले जारी गरेको निर्णयको अवज्ञा गर्नेलाई हामीले नियन्त्रणमा लिएर सचेत गराएका हौँ ।’
पछिल्लो समय कोभिडको महामारी रहेकाले सचेत रहन अपिल गरिएपनि अटेर गरेर पसल खोल्ने मानिसहरुलाई सम्झाउने काम भइरहेको उनले बताए ।
यस्तै, प्रहरीले यातायातमा जोरबिजोर लागू नगर्नेलाई पनि नियन्त्रणमा लिएर दुई घण्टासम्म सम्झाईबुझाई गरेको छ । नियन्त्रणमा रहने प्रायजसो इटहरी ६ नं. वडाका रहेको उनले बताए ।
‘हामीले आजैमात्र २१७ वटा मोटरसाइकल सहित चारपांग्रे र तीनपांग्रे सवारी साधन पनि नियन्त्रणमा लिएर दुईघण्टासम्म सम्झाइबुझाई गरेर छाडेका छौँ,’ उनले भने, ‘भोलिदेखि सवारी साधनमा पनि थप कडाइ गर्ने योजना बनाएका छौँ ।’
उनले अत्यावश्यक बाहेक घरबाहिर हिँडडुल नगर्न र गर्नैपरेपनि स्वास्थ्य मापदण्ड अनिवार्य प्रयोग गर्न सुझाए ।
यसअघि जिल्ला प्रशासन कार्यालय सुनसरीले शुक्रबार रातिदेखि लागू हुनेगरी विहान ११ बजेसम्म मात्रै पसल सञ्चालन गर्न निर्णय दिएको थियो ।
यो पनि – होटलको विषयमा सुनसरी प्रशासनले निर्णय सच्यायो (निर्णयसहित)
यो पनि – कोरोनाबाट अति प्रभावित जिल्लाको सूचीमा सुनसरीसहित पूर्वका तीन जिल्ला (सूचीसहित)
Discussion about this post