इटहरी : इटहरी उपमहानगरपालिकाकी उपमेयर लक्ष्मी गौतमले आफूखुशी ज्यादती गर्दै औषधी पसल शिल गरेको आरोप लगाउँदै औषधी व्यवसायीहरु आन्दोलित बनेका छन् ।
बुधबार उपमेयर गौतमको ठाडो निर्देशनमा कर शाखाका कर्मचारीसहित नगरप्रहरीले इटहरी उपमहानगरपालिकाले बजार अनुगमन गरी यहाँको सामुदायिक अस्पताल, कलश फार्मेशी र एरभ मेडिस्कोलाई शिल गरेको थियो । औषधी पसलेले आफूखुशी औषधीको नाम केरमेट गरेर बिक्री गरेको आरोप लगाएर शिल गरिएलगत्तै इटहरीका सबै औषधी व्यवसायीहरु आन्दोलित बनेका हुन् ।
‘हिजो अनुगमनको नाममा औषधी विज्ञलाई नै नल्याइकन उपमेयरले दादागिरी शैलीमा पसल बन्द गराएको अवस्था छ, हामी यसको घोर भत्र्सना गर्दछौँ,’ औषधी व्यवसायी संघ सुनसरीका उपाध्यक्ष प्रभातकुमार श्रेष्ठले भने, ‘औषधी सम्बन्धी जानकारी नै नभएका व्यक्तिहरु आएर औषधी पसल बन्द गराइएको छ, उचित कारण नदेखाइकन पसल बन्द गराइनु हदैसम्मको ज्यादती हो ।’
कोरोना महामारीको समयमा समेत ज्यानको प्रवाह नगरी सेवा दिइरहेको समयमा बजार अनुगमनको नाममा ज्यादती गरेको भन्दै व्यवसायीहरुले आपत्ति जनाएका छन् । उनीहरुले बिहीबारदेखि अनश्चितकालका लागि औषधी पसल बन्द गरेका छन् । ‘आजदेखि हामीले अनिश्चितकालका लागि इटहरीका सबै औषधी पसल बन्द गर्ने निर्णय गरेका छौँ,’ श्रेष्ठले टाकुरासँग भने, ‘नगरपालिकाको स्वास्थ्य शाखाबाट पनि कोही आएको अवस्था छैन, यसको सबै दोष उपमेयर नै हो ।’
बिहीबार बिहान उद्योग बाणिज्य संघ इटहरी, उपभोक्ता मञ्च इटहरी, औषधी व्यवसायी संघ सुनसरीको बैठक बसेपनि यकिन निर्णय नआएपछि अनिश्चितकालका औषधी पसल बन्द गरिएको व्यवसायीहरुले जनाएका छन् ।
‘जबरजस्ती दादागिरी शैलीमा बन्द गराइएको अवस्था छ, जनमानसमा औषधी पसलबाट अमर्यादित छन् भन्ने गलत सन्देश दिनका लागि उपमेयरको प्रोप्रोगाण्डा हो,’ आक्रोशमिश्रित रुपमा श्रेष्ठले भने, औषधी व्यवस्था विभागबाट कोही पनि मान्छे नल्याइकन औषधी पसल बन्द गर्न मिल्छ ?‘
बसेर समस्याको समाधान गर्नका लागि पहल गरिएपनि उपमेयर गौतमले ‘सबै मै हो’ भन्ने किसिमको जवाफ आएकोप्रति उनको आपत्ति थियो ।
यो समाचार तयार पार्दासम्म उपमहानगर परिसरमा उवासंघ इटहरी र औषधी व्यवसायीका प्रतिनिधिहरुबीच छलफल भइरहेको व्यवसायीहरुले बताएका छन् ।
यो पनि – औषधीको नाम केरमेट गरेर बिक्री गरिएपछि इटहरीका तीनवटा पसल शिल, औषधी व्यवसायीको आपत्ति
Discussion about this post