मोरङ : मोरङमा प्रेममा परेकी सरिताको हत्या प्रेमीका रुपमा देखिएका सुफल हस्दाले गरेको प्रहरीले जनाएको छ।
मोरङको कानेपोखरी गाउँपालिकास्थित होक्लाबारीकी ३० वर्षीया सरिता सोरेनको शव वैशाख १९ गते प्रहरीले रतुवामाई नगरपालिका–६ को मकैबारीमा फेला पारेको थियो।
वैशाख १७ गते घरबाट विवाहमा सहभागी हुने भन्दै घरबाट निस्किएकी सरिताको दुई दिनपछि वैशाख १९ गते मकैबारीमा बीभत्स अवस्थामा शव फेला परेको थियो।
घटनाको करिब डेढ महिनाको अनुसन्धानसँगै प्रहरीले सरिताको हत्यामा संलग्न ३१ वर्षीय रतुवामाई–६ का सुफल हस्दालाई पक्राउ गरेको छ।
मोरङ प्रहरी प्रमुख प्रहरी उपरीक्षक सन्तोष खड्काले सरिताको हत्यामा हस्दाको संलग्नता पुष्टि भएको जानकारी दिए।
घटनापछि अनुसन्धानका क्रममा दुवैबीच ६ महिनादेखि प्रेमसम्बन्ध रहेको प्रहरीले जनाएको छ । प्रहरी अनुसन्धानका क्रममा सरिताले विवाह गरी घर लैजान हस्दासमक्ष कर गरेका कारण घटना भएको खुलेको छ।
हत्यामा संलग्न सुफलले भने दुईवटा बिहे गरिसकेको खुलेको प्रहरीले जनाएको छ। प्रहरीका अनुसार घरमा सुफलका दुई श्रीमती र तीन सन्तान छन्। हत्या गरिएकी सरिता पनि एक सन्तानकी आमा हुन्।
पक्राउ परेका हस्दाविरुद्ध कर्तव्य ज्यान मुद्दा चलाउन मोरङ जिल्ला अदालतबाट बिहीबार म्याद थप गरेर प्रहरीले घटनाको अनुसन्धान सुरु गरेको छ।
Discussion about this post