धरान : धरान उपमहानगरपालिकाको आर्थिक बर्ष २०७८/७९ को नीति तथा कार्यक्रम र आर्थिक विधेयक पारित भएको छ ।
आज (शुक्रबार) आयोजित नवौं नगरसभाको दोश्रो बैठकले नीति तथा कार्यक्रम र आर्थिक विधेयक पारित गरेको हो । शनिबार पुनः बैठक बस्ने गरि स्थगित भएको उपमहानगरपालिकाका सूचना अधिकृत समेत रहेका राजश्व महाशाखा प्रमुख खगेन्द्र खतिवडाले जानकारी दिए ।
उनका अनुसार शनिबार सुनसरी उद्योग वाणिज्य संघको हलमा दिउँसो १ बजे बैठक बस्नेगरि स्थगित भएको हो । शनिबार बस्ने बैठकमा विनियोजन विधेयकमाथि छलफल हुनेछ ।
असार १५ गतेसम्म नीति तथा कार्यक्रम, आर्थिक विधेयक र विनियोजन विधेयकमाथि बोल्न चाहनेहरुलाई नाम टिपाउन समय दिइएको थियो । नाम टिपाएका वडाध्यक्ष तथा सदस्यहरुले आजको बैठकमा कुरा राखेका थिए ।
बैठकमा विधेयक प्रस्तुतकर्ता उपप्रमुख मञ्जु भण्डारीले सदस्यहरुले उठाएको विषयमा प्रष्ट पारेकी थिइन् । यस्तै, प्रमुख तिलक राईले विधेयक पारित गर्न प्रस्ताव गरेपछि ध्वनी मतले सर्वसम्मत रुपमा नीति तथा कार्यक्रम र आर्थिक विधेयक पारित भएको हो ।
असार १० गते उद्घाटन भएको नगरसभा असार १९ गते बस्ने गरि स्थगित भएको थियो । बजेटमा सहमति जुट्न नसकेपछि असार २५ गतेसम्मका लागि बैठक सारिएको थियो ।
नवौं नगरसभाले आगामी आर्थिक वर्ष २०७८/७९ को अनुमानित कूल बजेट २ अर्ब ३ करोड ६४ लाखकोबजेट, नीति तथा कार्यक्रम पेश भएको थियो ।
Discussion about this post