मोरङ : मोरङको रङ्गेलीमा नवजात शिशुको हत्या आरोपमा सुत्केरी महिला, पति र आमाबुबालाई पक्राउ गरेको प्रहरीले अर्का एक युवकलाई पनि पक्राउ गरेको छ ।
मोरङ प्रहरीको प्रारम्भिक अनुसन्धान अनुसार छिमेकी युवासँगको अवैध यौन सम्बन्धपछि बसेको गर्भबाट जन्मिएकी नवजात शिशु (छोरी) को हत्या अभियोगमा खुश्बु मण्डलसहित एकै परिवारका चारजनालाई प्रहरीले पक्राउ गरेको थियो ।
उनले आफैँले जन्माएको शिशुको जन्मिएको केहीबेरमै हत्या गरेकी थिईन् । महिलासहित एकै परिवारका चार जनालाई पक्राउ गरेको प्रहरीले छिमेकी २४ वर्षीय अजयकुमार सरदारलाई समेत पक्राउ गरेको छ ।
सरदारसँगको अवैध सम्बन्धबाट शिशु जन्मिएको र केहीबेरमै आमाले नै मारेको पुष्टि भएको प्रारम्भिक अनुसन्धानबाट खुलेको मोरङ प्रहरी प्रमुख एसपी जनार्दन जिसीले जानकारी दिए ।
हत्या अभियोगमा खुश्बुसहित पति २८ वर्षीय अरुण मण्डल, बाबु ५० वर्षीय नागेश्वर मण्डल र आमा ४८ वर्षीया उर्मिला मण्डललाई गत सोमबार प्रहरीले पक्राउ गरेको थियो ।
शिशुको हत्या भएपछि चार जना पक्राउ परेलगत्तै फरार बनेका अजयलाई खुश्बुले दिएको बयानका आधारमा गाउँमै लुकेर बसेको अवस्थामा बिहीबार पक्राउ गरिएको एसपी जिसीले बताए ।
उनीविरुद्ध प्रहरीले कर्तव्य ज्यान मुद्दा चलाउन बिहीबार नै अदालतबाट म्याद थप गरेर घटनाको अनुसन्धान अघि बढाएको छ ।
प्रहरीको प्रारम्भिक अनुसन्धान अनुसार खुश्बुका पति अरुण तीन वर्षअघि वैदेशिक रोजगारीका लागि मलेसिया गएका थिए । गत चैतमा मात्रै उनी घर फर्किएका थिए ।
आफू विदेशबाट फर्किएको छोटो समयमै पत्नीले सन्तान जन्माएपछि अरुणले घरमा झगडा गरेको र झगडापछि खुश्बुले शिशुको हत्या गरेको प्रहरीले जनाएको छ ।
प्रहरीका अनुसार अरुण विदेश गएपछि नजिकिएका अजयसँगको अवैध शारीरिक सम्पर्कबाट खुश्बु गर्भवती बनेकी थिइन् ।
कोसी अनलाइनको सहयोगमा ।
Discussion about this post