इटहरी : सुनसरीको इनरुवा नगरपालिका ४ पूर्व–पश्चिम राजमार्गमा पर्ने इनरुवा बसपार्कबाट कारमा सवार पाँच जनालाई लागूऔषध ब्राउनसुगरसहित प्रहरीले पक्राउ गरेको छ ।
जिल्ला प्रहरी कार्यालय सुनसरीका प्रवक्ता प्रहरी नायब उपरीक्षक नरेन्द्र कार्कीका अनुसार पक्राउ पर्नेमा सप्तरी हनुमाननगर कंकालिनी १४ का २० वर्षीय अमोद कुमार यादव, सप्तरी तिलाठी कोलारी ४ का २० वर्षीय ईनर कुमार मुखिया, सप्तरी रामपुर मलहनिया १४ का २४ वर्षीय बिनोद कुमार कामत, सप्तरी तिलाठी कोलारी ४ का १९ वर्षीय रमेश मुखिया र कार चालक तिलाठी कोलारी ४ का २२ वर्षीय फूलकुमार मुखिया रहेका छन् ।
सोमबार राति विशेष सूचनाको आधारमा लागूऔषध नियन्त्रण ब्यूरो विराटनगर र जिल्ला प्रहरी कार्यलाय सुनसरीबाट खटिएको प्रहरी टोलीले पश्चिमबाट आउँदै गरेको बा १४ च ६१४५ नम्बरको कारलाई रोकेर चेकजाँच गर्दा लागूऔषध रहेको पाइएपछि उनीहरुलाई पक्राउ गरिएको डीएसपी कार्कीले जानकारी दिए ।
कारमा सवार पाँच जनामध्ये अमोद कुमार यादवको साथबाट लागूऔषध ब्राउनसुगर १३० ग्राम फेला परेको थियो ।
ब्राउनसुगर फेला परेपश्चात थप अनुसन्धानको लागि कार सहित पाँचै जनालाई नियन्त्रणमा लिई जिल्ला प्रहरी कार्यालय सुनसरीबाट थप अनुसन्धान भइरहेको प्रहरीले जनाएको छ ।
Discussion about this post