मोरङ : मोरङको विराटनगरमा बिचौलियाको कार्य गरी सर्वसाधारणलाई दुःख हैरानी दिने दुईजनालाई प्रहरीले पक्राउ गरेको छ ।
पक्राउ पर्नेमा विराटनगर महानगरपालिका ८ अमरटोल १८ वर्षीय प्रधुम्न राय र २३ वर्षीय आनन्द कुमार साह रहेका छन् ।
उनीहरुले विराटनगर महानगरपालिका अन्तर्गत विभिन्न अस्पतालहरूमा उपचार गराउन आएका बिरामी तथा बिरामीका आफन्तहरूलाई भेटेर यहाँ डाक्टर राम्रो छैन, यो अस्पतालमा कोरोना धेरै छ, उपचार राम्रो छैन भन्ने जस्ता अफवाह फैलाई बिरामी तथा आफन्तहरूलाई ठगी गर्ने गरेको प्रहरीको प्रारम्भिक अनुसन्धानमा खुलेको छ ।
आफ्नो सम्पर्कमा भएको अस्पताल वा क्लिनिकमा उपचारको लागि प्रेरित गर्ने र सम्पर्कमा भएको फार्मेसीमा औषधि किन्न बाध्य गराउने विचौलियाको कार्य गरी सर्वसाधारण नागरिकलाई दुःख हैरानी दिने गरेको विशेष सूचनाको आधारमा जिल्ला प्रहरी कार्यालय मोरङ र १ नम्बर प्रदेश प्रहरी कार्यालय समूहको प्रहरी टोलीले भदौ ३ गते पक्राउ गरेको हो ।
पक्राउ परेका दुवैजनालाई जिल्ला प्रहरी कार्यालय मोरङबाट थप अनुसन्धान भइरहेको प्रहरीले जनाएको छ ।
यस्तो किसिमको ब्यवहारबाट अन्य कोही पनि पीडित रहेको वा हुन गइरहेको भए प्रहरीलाई खबर गर्न समेत प्रहरीले अपिल गरेको छ ।
Discussion about this post