इटहरी : धरान उपमहानगरपालिका १८ स्थित बुद्वचोकको न्यू कान्तिपुर होटल एण्ड गेस्ट हाउसमा मृत भेटिएकी महिला इटहरीको भएको खुलेको छ ।
इलाका प्रहरी कार्यालय धरानका प्रहरी नायब उपरीक्षक नरेन्द्र कुँवरका अनुसार इटहरी उपमहानगरपालिका वडा नम्बर ५ तुलसा टोल बस्दै आएकी ३९ वर्षीया सुमित्रा तामाङ्ग सो होटलमा आज (मंगलबार) बिहान मृत भेटिएकी हुन् ।
दुईदिन अघि एक जना पुरुषसँगै उक्त होटलको कोठा नं. १०९ मा बसेकी महिलाको आज बिहान मात्रै कर्मचारीले सफाइ गर्ने क्रममा शव फेला पारेर प्रहरीलाई खबर गरेका थिए । नागरिकताको आधारमा प्रहरीले परिवारसँग सम्पर्क गर्दा मृतकका छोरा–छोरीले सुमित्राको सनाखत गरेको डीएसपी कुँवरले बताए ।
प्रहरीका अनुसार मृतकको स्थायी ठेगाना पाँचथरको मिक्लाजुङ गाउँपालिका वडा नम्बर १ हो । उनी केहीवर्षयता इटहरीमा बसोबास गर्दै आएको खुलेको छ । मृतकका श्रीमान हाल बु्रनाईमा कार्यरत रहेको बताइएको छ ।
मृतकको अनुहारमा चोट देखिएकोले उनको हत्या भएको हुन सक्ने प्रहरीको अनुमान छ । दुई दिन देखि सोही कोठामा बस्दै आएका पुरुष अहिले फरार अवस्थामा रहेको र उनको खोजी भइरहेको प्रहरीले जनाएको छ ।
‘मृतकका आफन्त आएर सनाखत भएको छ, इटहरीमा डेरा गरेर बस्ने भन्ने खुलेको छ, थप अनुसन्धानकै क्रममा छौँ,’ डीएसपी कुँवरले भने ।
घटनास्थलमा मुचुल्का उठाएर अहिले उनको शव वीपी कोइराला स्वास्थ्य विज्ञान प्रतिष्ठानको शव गृह लगिएको प्रहरीले जनाएको छ ।
फरार रहेका युवाले नाम जीवन मगर र ठेगाना धनकुटा लेखाएका छन् । तर, उनको नाम र ठेगाना गलत लेखाएको हुनसक्ने प्रहरीको अनुमान छ । फरार पुरुषको खोजी भइरहेकाले उनलाई नियन्त्रणमा लिएपछि घटनाको कारण पत्ता लाग्ने धरान प्रहरीले जनाएको छ ।
यो पनि – धरानको गेस्ट हाउसमा एक महिला मृत फेला, सँगै बसेका पुरुष फरार
Discussion about this post