इटहरी : विराटनगर महानगरपालिका २ मा रहेको स्पर्श नेपाल नामक सुधार केन्द्रबाट भागेका धरानका एक युवक मृत फेला परेका छन् ।
प्रदेश १ प्रहरी कार्यालय विराटनगरका अनुसार मंगलबार (हिजो) चारजना युवा सुधार केन्द्रबाट भागेका थिए ।
खोजी गर्ने क्रममा मोरङको कटहरी गाउँपालिका र विराटनगर महानगरपालिकाको सीमा भएर बग्ने खोलाको दहमा सुनसरीको धरान उपमहानगरपालिका १६ घर भएका २५ वर्षिय दिलेन्द्र परियार मृत फेला परेका हुन्।
इटहरीबाट गएको सशस्त्र प्रहरीको गोताखोर टोलीले दहबाट परियारको शव बाहिर निकालेको सशस्त्र प्रहरी बल मोरङका प्रमुख एसपी राजकुमार लामिछानेले जानकारी दिए।
भागेकामध्ये धरान १६ का निशान धमलालाई भाग्दाभाग्दै प्रहरी र सुधार केन्द्रको टोलीले नियन्त्रणमा लिएको थियो। विराटनगरका दिनेश बस्नेत र रोहित कामत परिवारको सम्पर्कमा पुगिसकेको मोरङ प्रहरी प्रमुख एसपी जनार्दन जीसीले बताए।
भाग्ने क्रममा उनी खोलामा हामफालेर बेपत्ता थिए। दहमा हामफालेपछि बाहिर निस्कन नसक्दा पानीमा डुबेर उनको मृत्यु भएको प्रहरीको प्रारम्भिक अनुसन्धानबाट खुलेको छ ।
शव पोस्टमार्टमका लागि कोसी अस्पताल लगिएको प्रहरीले जनाएको छ । प्रहरीले घटनाबारे अनुसन्धान सुरु गरेको जनाएको छ ।
Discussion about this post