इटहरी : नेपाली कांग्रेसका केन्द्रीय सदस्य मीन विश्वकर्माले अमेरिकी मिलिनियम च्यालेन्ज कर्पोरेशन (एमसीसी) बारे अनावश्यक र नकारात्मक भ्रम फैलाइएको बताएका छन् ।
आइतबार सुनसरी जिल्ला पार्टी कार्यालय इनरुवामा ‘घरघर जाऔँ, कांग्रेस जिताऔँ’ अभियानअन्तर्गत भएको प्रशिक्षण कार्यक्रममा बोल्दै उनले एमसीसीबारे नकारात्मक भ्रम फैलाइएको बताएका हुन् ।
‘अमेरिकाको सुरक्षा नीति अनुसार नेपाल चल्नुपर्छ, संविधानभन्दा माथि एमसीसी हुन्छ भन्नेजस्ता नकारात्मक भ्रम फैलाइयो,’ उनले भने, ‘एमसीसीका प्रत्येक बुँदा एकपटक पढ्नुहोस्, यो विकासको परियोजना बाहेक अरु केही होइन ।’
अझैपनि जनतासमक्ष एमसीसीबारे अनावश्यक भ्रम रहेको र यो भ्रमलाई चिरेर एमसीसीबारे जनतालाई बुझाउनुपर्ने बताए ।
उनले आगामी निर्वाचन अगाडि जनताको घरघरमा गएर एमसीसीबारे भएका भ्रम बुझाउनुपर्ने र कांग्रेसले गरेका विकासको प्रचार गर्नुपर्नेम जोड दिए ।
पूर्व मन्त्रीसमेत रहेका विश्वकर्माले आउँदै गरेको स्थानीय निर्वाचन दलहरूबीचको प्रतिष्पर्धा रहेका कारण कांग्रेस एक हुनुको विकल्प नरहेको बताए । उनले भने, ‘निर्वाचन दलहरूबीचको प्रतिष्पर्धा हो, त्यसकारण कांग्रेस एक हुनुको विकल्प छैन, निर्वाचन भनेको शान्तिपूर्ण युद्व हो, यहाँ गोली चल्दैन, यहाँ बोली चल्छ ।’
उनले निर्वाचन भनेको शान्तिपूर्ण युद्व रहेकाले सभ्य ढङ्बाट निर्वाचनमा होमनुपर्ने आवश्यक रहेको तर्क राखे । आइतबारदेखि देशभर सुरु भएको ‘घरघर जाऔँ, कांग्रेस जिताऔँ’ अभियान कार्यक्रम सुनसरीमा पनि सुरु भएको छ ।
सुनसरीका लागि कांग्रेस केन्द्रीय सदस्य अमृत अर्याल प्रतिनिधि भएर खटिएका छन् । २९ फागुनबाट २९ चैतसम्म गरी एक महिना स्थानीय तह निर्वाचन लक्षित विशेष अभियान सञ्चालन गर्न लागिएको हो ।
सरकारले आगामी ३० वैशाखका लागि स्थानीय तह निर्वाचन मिति तय गरिसकेको छ । अभियानका लागि कांग्रेसले मंगलबार ७७ वटै जिल्लामा केन्द्रीय सदस्य प्रतिनिधि तोकेको छ ।
अभियानमार्फत कांग्रेसले संगठन सुदृढीकरण गर्दै हालसम्म आफ्नो सरकारका पालामा गरेका काम, ‘राजनीतिक र आर्थिक गतिविधि’ अभियानमार्फत मतदातालाई जानकारी दिने तयारी गरेको हो ।
भिडियो
Discussion about this post