इटहरी : नेपाल पत्रकार महासंघको ६७ औँ स्थापना दिवसको अवसरमा इटहरीमा प्रभातफेरी कार्यक्रमको आयोजना गरिएको छ ।
बुधबार (आज) बिहान नेपाल पत्रकार महासंघ सुनसरीको आयोजनामा इटहरी नगरपरिक्रमा गरी प्रभातफेरी कार्यक्रमको आयोजना गरिएको हो ।
नगरपरिक्रमापछि कार्यक्रममा बोल्दै पत्रकार महासंघ सुनसरीका पूर्वअध्यक्ष तथा अग्रज पत्रकार हर्ष सुब्बाले सुनसरी पत्रकार महासंघको लागि ऐतिहासिक जिल्ला रहेको बताए ।
उनले भने, ‘नेपाल पत्रकार संघबाट महासंघ बनाउनका लागि सुनसरीले अहम् भूमिका खेलेको छ, २०५३ सालमा धरानमा भएको कार्यक्रमले संघबाट महासंघ भएको हो ।’
उनले सुनसरी पत्रकारिता क्षेत्रको ऐतिहासिक जिल्ला रहेकाले यहाँका पत्रकारको प्रेस स्वतन्त्रता तथा हकहितमा महासंघले काम गर्नुपर्ने सुझाव दिए ।
यस्तै, नेपाल पत्रकार महासंघका केन्द्रीय सदस्य अमर खड्काले विभिन्न बहानामा मिडिया हाउसले अहिलेपनि पत्रकारलाई बेतलबी बिदामा राख्ने, पारिश्रमिक नदिने जस्ता काम गरेकाले श्रमजीवी पत्रकारको हितमा महासंघले काम गरिरहेको बताए ।
‘पछिल्लो समय नेपालमा पत्रकारिता क्षेत्र अवसर र चुनौतीका बीच गुज्रिरहेको छ,’ उनले भने, ‘जसलाई समस्या परेको छ, ती समस्या समाधानका निम्ति हामी लागिरहेका छौँ ।’
अघिल्ला वर्षभन्दा पछिल्लो समय प्रेस स्वतन्त्रता हननका घटना भइरहेकाले पत्रकार आफैँले पनि सचेत हुनुपर्ने उनले बताए ।
पत्रकार महासंघ प्रदेश १ का सचिव देबेन्द्र कार्कीले पत्रकारिता क्षेत्रको ऐतिहासिक जिल्ला सुनसरी रहेकाले आफूहरू गौरवान्वित भएको बताए ।
उनले देशका ठूला राजनीतिक परिवर्तनमा पनि पत्रकारिता जगत्को भूमिका अपरिहार्य रहेको बताए ।
कार्यक्रममा महासंघ सुनसरीका अध्यक्ष जनकऋषि राईले आफूहरू जिल्लाका पत्रकारहरूको हितमा काम गरिरहेको बताए ।
जिल्लामा हाल २६२ जना क्रियाशिल रहेकाले उनीहरूको पक्षमा महासंघले काम गर्दै आएको उनको भनाइ छ । यस्तै, हाल महासंघको भवन इटहरीमा पनि बन्ने क्रममा रहेको उनले बताए ।
२०१२ सालमा स्थापना भएको नेपाल पत्रकार संघ २०५३ सालमा सुनसरीको धरानबाट विधान संशोधन गरी संघबाट महासंघ बनाइएको हो ।
भिडियो
Discussion about this post