मोरङ : अवैध सामान लोड गरिएको एउटा पिकअप भ्यानलाई सशस्त्र प्रहरीले मोरङको रङ्गेली नगरपालिका–६ मधुवनीबाट नियन्त्रणमा लिएको छ ।
भन्सार छलेर सामान लोड गरेर भारतबाट नेपाल छिरेको प्रदेश १–०४–००१ च ०३६० नम्बरको पिकअपलाई नियन्त्रणमा लिइएको सशस्त्र प्रहरी बल मोरङका प्रमुख एसपी राजकुमार लामिछानेले जानकारी दिएका छन् ।
एसपी अनुसार नियन्त्रणमा लिएर पिकअप खानतलासी गर्दा विभिन्न ४८ प्रकारका तस्करीका सामान फेला पारिएको छ । बरामद गरिएका सामानको बिल लगायतका कागजपत्र फेला पार्न नसकिएको उनले बताएका छन् ।
तस्करीको सामान लोड गरेर पिकअप मङ्गलबार साँझ तिर रङ्गेलीको मधुवनी आइपुगेको थियो । सशस्त्र प्रहरी बल बिओपी बोर्डर आउट पोस्ट रङ्गेलीका प्रहरी निरीक्षक कमलबहादुर अधिकारी नेतृत्वको टोलीले रोक्न खोज्दा पिकअप छाडेर चालक फरार भएको एसपी लामिछानेले बताएका छन् ।
चालकको खोजी भइरहेको सशस्त्रले जनाएको छ । पिकअपका धनीको पनि पहिचान खुलेको छैन । तर सशस्त्रले बरामद भएको सामानसहित पिकअपलाई आवश्यक कारबाहीका लागि बुधबार विराटनगर भन्सार कार्यालयमा बुझाएको छ ।
एसपी लामिछानेले पिकअपबाट साइकल र मोटरसाइकलका पार्टपूर्जा, कपडा, चप्पल, जुत्ता, कार्पेट, हारबोजाइन लिक्विड, इलेक्ट्रिक मोटर, एयर मोटर, टेन्ट, प्लाष्टिकका प्लेटलगायतका सामानहरू बरामद भएको जानकारी दिएका छन् ।
सामान र पिकअपको मूल्य २२ लाख पाँच हजार रूपैयाँ बराबर कायम भएको छ ।
Discussion about this post