इटहरी : इटहरीमा रहेको एसओएस हर्मन माइनर माध्यमिक विद्यालयमा दुईदिने शिक्षासम्बन्धी कार्यशाला सम्पन्न भएको छ ।
इटहरीमा गुणस्तरीय शिक्षाको केन्द्रका रूपमा रहेको यस विद्यालयमा गत मङ्गलबार र बुधबार कार्यशाला सम्पन्न भएको हो ।
शिक्षामा विज्ञान, इन्जिनियरिङ, टेक्नोलोजी, कला र गणित सबैको उपयोग गर्दै विद्यार्थीमा सिकाइ सिपको विकास गर्ने लक्ष्यका साथ कार्यशाला आयोजना गरिएको विद्यालयका प्रधानाध्यापक शान्तिराम तिम्सिनाले बताए ।
काठमाडौँ युनिभर्सिटी अफ स्कुल एजुकेशनका लेक्चरर इन्द्रमणि श्रेष्ठ र काठमाडौँ युनिभर्सिटी अफ स्कुल एजुकेशनका भिजिटिङ लेक्चरर सञ्जयकुमार पन्तले संयुक्त रूपमा कार्यशालामा प्रशिक्षण दिएका थिए । श्रेष्ठले विद्यालयमा कार्यरत २६ जना शिक्षकलाई तथा पन्तले कुशल अभिभावकत्व तालिम समूहलाई प्रशिक्षण दिएका थिए ।
शिक्षा पाठ्यक्रम केन्द्रित भएको र सिकाइ सिपमा प्रभाव पर्दै गएको परिप्रेक्ष्यमा श्रेष्ठ र पन्तको यो संयुक्त समूहले देशभर कार्यशाला गराउँदै आएको छ। कलाका पाँच विधा कथा, कविता, नाटक, नाच र गीतका माध्यमबाट विद्यार्थीमा हरेक किसिमका जटाल विषय पनि रूचीका साथ सिकाउन सकिने प्रशिक्षक श्रेष्ठले बताए ।
‘अर्थमुखी बन्दै गइरहेको विश्वको शिक्षा प्रणालीलाई थोरै भए पनि कलाले मानवीय मूल्य र मान्यताबारे सोच्न सिकाउने हुँदा हामी यसलाई देशभरका विद्यालयमा लागू गराउन लागी परेका छौँ’, श्रेष्ठले बताए ।
स्टीम सिकाइ विधिबारे शिक्षकहरूमा प्रशिक्षण प्रदान गर्ने इटहरीमा एसओएस हर्मन माइनर माध्यमिक विद्यालय पहिलो विद्यालय बनेको छ।
यस विद्यालयले विभिन्न समुदायका र विशेष गरी एसओएस बालग्राममा आश्रित बालबालिकाहरूलाई गुणस्तरीय शिक्षा प्रदान गर्दै आइरहेको विद्यालयका सहप्रधानाध्यापक शशिकुमार उपाध्यायले बताए ।
Discussion about this post