मोरङ : मोरङको कटहरी गाउँपालिका १ मा एक पुरुषको हत्या भएको छ ।
हत्यामा संलग्न तीन जना युवालाई प्रहरीले पक्राउ गरेको छ । पक्राउ पर्नेमा कटहरी १ का ३३ वर्षीय रविन भुजेल, २९ वर्षीय कपिल माझी र कटहरी–३ का २८ वर्षीय नितेश चौधरी रहेका छन् ।
उनीहरूले कटहरी गाउँपालिका २ घर भएका ५० वर्षीय तुलसी श्रेष्ठको हत्या गरेको प्रहरीको अुनसन्धानबाट खुलेको छ ।
शनिबार राति घरबाट हिँडेका तुलसीको खोजी गर्ने क्रममा हत्या गरेर फालेको अवस्थामा शव कटहरी १ महेशपुरस्थित सडक छेउको नालीनजिकै खेतको डिलमा आइतबार बिहान फेला परेको हो ।
प्रहरीको अनुसन्धान अनुसार रातको समयमा मादक पदार्थ सेवन (मापसे) गरेर होहल्ला गर्दै हिँडेका तुलसीसँग बाटोमा भेट भएपछि सम्झाईबुझाई गर्ने क्रममा उनीहरुसँग विवाद भएको थियो ।
सम्झाउने क्रममा विवाद भएपछि तीन जना मिलेर बाँसको मुङ्ग्रो र ढुङ्गाले टाउकोमा प्रहार गरी हत्या गरिएको मोरङ प्रहरीका प्रवक्ता डीएसपी दीपक श्रेष्ठले बताए ।
घटनामा प्रयोग गरिएको मुङ्ग्रो पनि प्रहरीले बरामद गरेको छ ।
हत्यामा संलग्नविरुद्ध प्रहरीले कर्तव्य ज्यान मुद्दा चलाउने भएको छ । घटनाबारे थप अनुसन्धान भइरहेको प्रहरीले जनाएको छ ।
Discussion about this post