मोरङ : मोरङमा विभिन्न घटनामा एकैदिन चारजनाको मृत्यु भएको छ । जिल्लाको विराटनगरमा तीनजना र बेलबारीमा एकजनाको मृत्यु भएको प्रहरीले जनाएको छ ।
बेलबारी नगरपालिका ८ का ७४ वर्षीय वृद्ध चन्द्रमान गुरुङको रुखबाट लडेर मृत्यु भएको छ । भाउन्नेको जङ्गलमा बाख्रालाई घाँस काट्न गएका उनी हल्लुडेको रुखबाट लडेर गम्भीर घाइते भएका थिए ।
गुरुङको उपचारका क्रममा विराटनगरस्थित नोबेल शिक्षण अस्पतालमा साँझ ६ः२० बजेतिर मृत्यु भएको मोरङ प्रहरीका प्रवक्ता डिएसपी दीपक श्रेष्ठले जानकारी दिए ।
यस्तै, विराटनगर महानगरपालिका १० मा मोटरसाइकलको ठक्करबाट एकजना वृद्ध पुरुषको मृत्यु भएको छ । को ३९ प ७८९५ नम्बरको मोटरसाइकलको ठक्करबाट विराटनगर १२ का ८५ वर्षीय मुसा यादवको मृत्यु भएको छ ।
यस्तै, विराटनगर ४ स्थित मोटर ग्यारेजमा काम गर्दै आएका ३५ वर्षीय सुमित दाहाल मृत फेला परेका छन् । दाहालको शव घोप्टो परेको अवस्थामा फेला परेको हो ।
घटनाका बारेमा अनुसन्धान थालिएको र हालसम्म मृत्युको कारण पत्ता लाग्न नसकेको डीएसपी श्रेष्ठले बताए ।
यस्तै, विराटनगर १२ आइतबारे नहर चोकनजिक साँझ एक जना पुरुष मृत फेला परेका छन् । पहिचान नखुलेका अन्दाजी ३२ वर्षीय पुरुष मृत फेला परेको प्रहरीले जनाएको छ ।
मृतक चारैजनाको सम्बन्धमा प्रहरीले थप अनुसन्धान सुरु गरेको डीएसपी श्रेष्ठले जानकारी दिए ।
Discussion about this post