इटहरी : इटहरीका निवर्तमान मेयर द्वारिकलाल चौधरीमाथि अर्कैको नाममा रहेको जग्गा हडपेको आरोप लागेको छ ।
चौधरीले इटहरीका प्रदीपकुमार खतिवडाको एक कट्ठा जमिन हडपेर माछा पालन गरेको पाइएको हो ।
इटहरी १७ बालग्राममा रहेको ८ (घ) नक्सा नम्बरको कित्ता नं. ६०६ को जग्गा चौधरीले करीब दुई महिनाअघिदेखि हडपेर माछा पालन गरेका हुन् । मेयरको कार्यकाल सकिएको करीब चार महिनापछि उनले पार्टी र शक्तिको उन्माद देखाउँदै अर्कैको जग्गा हडपेको पीडितले आरोप लगाएका छन् ।
सोमबार (आज) पीडितले पत्रकार सम्मेलन गर्दै आफूहरूमाथि चौधरीद्वारा दमन भएको बताएका छन् ।
‘हामीले आफ्नो जग्गामा आफैँ भोगचलन गर्न पाउनुपर्ने, अर्काको जग्गामा नसोधीकन र कुनै सम्झौतै नभई उहाँले हडप्नुभयो,’ पीडित प्रदीप खतिवडाले भने, ‘हामीले यो विषयमा पटकपटक जानकारी गराउँदापनि बेवास्ता गरेपछि बाध्य भएर पत्रकार सम्मेलन गर्नुपरेको हो ।’
पूर्जा अनुसार २०६३ जेठ १ गते नाथुराम चौधरीको नाममा रहेको जग्गा प्रदीपको नाममा पास भएको देखिन्छ । नाथुराम उनै द्वारिकलालका बुबा हुन् । उनीहरूले २०६३ सालमा खतिवडालाई एक कट्ठा जमिन बेचेका थिए । आफूलाई भूमिपुत्र बताउने चौधरीले अर्कैको जग्गा हडपेछि अहिले पीडितले न्याय माग गरिरहेका छन् ।
पीडित प्रदीपका छोरा अनमोलका अनुसार इटहरी उपमहानगरपालिकामा गत भदौ २७ गते निवेदन समेत दिइएको छ । सोही दिन उपमहानगरले पत्र काटेर स्पष्टीकरण सोधेपनि चौधरीले लिखित, मौखिक कुनै जवाफ दिएका छैनन् ।
अनमोलले भने, ‘जग्गा हडपेपछि हामीले इटहरी उपमहानगरपालिकामा निवेदन पनि हाल्यौँ, मेयरमार्फत गत भदौ २७ गते पत्र पठाइयो उहाँ (द्वारिकलाल) ले पत्र बुझ्न मान्नुभएन ।’ हुँदाखाँदाको जग्गा भूमाफिया शैलीमा ज्यादती गरीकन हडप्नु अस्वभाविक भएको उनको तर्क छ ।
‘घडेरी जग्गा भएकाले हामी बेलाबेला मात्रै जग्गामा जान्थ्यौँ,’ उनले भने, ‘हुँदाखादाँको जग्गा दादागिरी शैलीमा हडपेपछि हामीले उहाँलाई पटकपटक जानकारी गराएपनि वास्तै गर्नुभएन ।’
चौधरीले शक्तिको आडमा जग्गा हडपेको उनको भनाई छ ।
चौधरीले हुकुमी शैलीमा जग्गा खनेर पोखरी बनाएपछि पीडितले भने पहिलेकै जस्तो पुरिदिन माग राखेका छन् ।
‘पहिलेकै अवस्थामा गरीदिनुहुन भनी पटकपटक अनुरोध गर्दा नमानेको र उल्टै धाकधम्की दिई मेरो नामको जग्गा भोगचलन गरेको हुँदा उक्त जग्गाबाट पोखरी बनाइ मेरो जग्गा खेतीयोग्य बनाई पाउन यो निवदेन पेश गरेको छु,’ इटहरी उपमहानगरपालिकामा गत भदौ २७ गते पीडितले दिएको निवेदनमा भनिएको छ ।
यस विषयमा चौधरीसँग प्रतिक्रिया लिदाँ उनले नबोल्ने बताए । ‘त्यो विषयमा म बोल्दिन, त्यो बारेमा मलाई बोल्नु छैन,’ उनले टाकुरासँग भने, ‘त्यो विषयमा उसले मुद्धा नै हालेको छ, अदालतको फैसला पर्खिए भै गो त ।’
अहिले खतिवडाले नगरपालिकामा मुद्धा हालेकाले आफूले त्यस विषयमा नबोल्ने चौधरीले बताए । ‘नगरपालिकाको फैसला पर्खिए भै गो त, पत्रकार सम्मेलन गर्छ के गर्छ त्यो उसको कुरा हो ।’ चौधरीले भने ।
चौधरीले भनेजस्तो अदालतको फैसला पर्खिने भएपनि पीडितले अदालतमा मुद्वा नहालेको बताए । ‘हामीले पटकपटक भन्दा पनि अटेर गरेपछि उपमहानगरपालिकामा निवेदन हालेका हौँ,’ पीडित प्रदीपले भने, ‘उपमहानगरले स्पष्टीकरण सोधेपनि उहाँले पत्र नै बुझ्न नमानेको कुरा छ ।’
चौधरी इटहरी उपमहानगरपालिकाको मेयर हुँदा पटकपटक विवादास्पद छवि बनाएका व्यक्ति हुन् । नेकपा एमालेबाट ०७४ सालमा इटहरीको मेयरमा निर्वाचित भएका चौधरी केही साताअघि मात्रै नेकपा माओबादी केन्द्रमा प्रवेश गरेका छन् । चौधरीलाई पार्टी अध्यक्ष प्रचण्डले स्वागत गरेका थिए ।
उनलाई अहिले सत्ता गठबन्धनको तर्फबाट माओबादी केन्द्रले सुनसरी क्षेत्र नं. २ (क) बाट प्रदेशसभा सदस्यको उम्मेदवार बनाएको छ ।
भिडियो
Discussion about this post