इटहरी (डेस्क) : मोरङमा छठ पूजामा आएका एक बालकको हत्यामा संलग्न पाँचजनालाई प्रहरीले पक्राउ गरेको छ ।
जिल्ला प्रहरी कार्यालय मोरङका डीएसपी दीपक श्रेष्ठका अनुसार झापाको दमक नगरपालिका १० आमवाडीका १४ वर्षीय दियुस श्रेष्ठको हत्यामा संलग्न भएको आरोपमा प्रहरीले पाँच जनालाई पक्राउ गरेको हो ।
छठको मेला हेर्न मोरङ र झापाको सीमानामा पर्ने मावा खोलामा आएको बेला आइतबार राति उनीमाथि छुरा प्रहार भएको थियो । उपचारका क्रममा उनको सोमबार बिहान मृत्यु भएको हो ।
पक्राउ पर्नेमा उर्लाबारी नगरपालिका ६ चन्द्रमा चौक बस्ने १७ वर्षीय बस्नेत, सोही वडाको वानडाँडा बस्ने १७ वर्षीय खवास, तामाङ, पानीट्यांकी बस्ने १६ वर्षीय माझी र तरूण चौक बस्ने १६ वर्षीय खत्री थरका किशोर छन् ।
हत्यामा संलग्न भएको आरोपमा प्रहरीले १८ वर्ष मुनीका पाँच किशोरलाई पक्राउ गरेको हो । उनीहरूको नाम तत्काल गोप्य राखिएको डीएसपी श्रेष्ठले बताए ।
छठ पूजामा मृतक श्रेष्ठले मुख छाडेको निहुमा छुरा प्रहार गरेको प्रहरीको प्रारम्भिक अनुसन्धानबाट खुलेको छ ।
‘मृतक र संलग्नबीच पुरानै चिनजान देखिन्छ, मेलामा भनाभन र मुख छाडेपछि छुरा प्रहार भएको खुलेको छ,’ प्रहरी स्रोतले भन्यो ।
पक्राउ परेका पाँचजनालाई पक्राउ गरेर आवश्यक अनुसन्धान सुरु गरिएको मोरङ प्रहरीले जनाएको छ ।
यो पनि – मोरङमा छठ पूजामा छुरा प्रहार गरी १४ वर्षीय बालकको हत्या
Discussion about this post