इटहरी : सुनसरीमा शान्तिपूर्ण रूपमा निर्वाचन सम्पन्न गर्न आँफूहरू गम्भीर रहेको प्रमुख जिल्ला अधिकारी इन्द्रदेव यादवले बताएका छन् ।
शनिबार (आज) इटहरीमा नेपाल पत्रकार महासंघ सुनसरीको आयोजना तथा संवाद समूह सुनसरीको सहकार्यमा भएको निष्पक्ष, स्वतन्त्र निर्वाचनमा सञ्चारमाध्यमको भूमिका विषयक अन्तरक्रिया कार्यक्रममा बोल्दै प्रजिअ यादवले निर्वाचन शान्तिपूर्ण रूपमा सम्पन्न गर्ने बताएका हुन् ।
‘सुनसरीमा निर्वाचनका लागि कुनै समस्या छैन, शान्तिपूर्ण रूपमा निर्वाचन सम्पन्न गर्छौँ,’ यादवले भने, ‘हरेक मतदानस्थल संवेदनशील छ र हरेक मतदानस्थल सामान्य पनि छ ।’
उनले सबैजसो मतदानस्थल संवेदनशील र सबैजसो सामान्य रहेको तर्क गरे ।
सञ्चार माध्यममा जनमत हुँदैन तर जनमत सृजना गर्ने तागत हुने भएकाले कोही उम्मेदवारलाई ‘हेभीवेट र कमजोर’ भनेर विश्लेषण नगर्न उनको आग्रह छ ।
जिल्लामा केही मानिसहरूले निर्वाचन बहिष्कार गर्ने सांकेतिक विरोध गरेपनि आँफूहरूले छलफल गरेकाले कुनै किसिमको नकारात्मक गतिविधि हुन नदिन सुरक्षा निकाय गम्भीर रहेको उनको भनाइ छ ।
मौन अवधिको समयमा ‘भोट किनबेच’ हुने कुरा उठिरहँदा पछिल्लो समय मतदाता शिक्षित भएको उनले बताए ।
सुनसरीका मुख्य निर्वाचन अधिकृत अर्जुन अधिकारीले जिल्लामा केही आचारसंहिता उल्लघंन भएका घटना भएपनि आँफूहरू अनुगमनकै क्रममा रहेको बताए । मतदातालाई मिथ्या सूचनाको पछि नलाग्न पनि उनले सजगता हुनुपर्ने बताए ।
‘हामीले कतिपय मतदानस्थलमा अपाङ्गमैत्री बनाउने प्रयास गरेका छौँ,’ उनले भने, ‘अपाङ्ग र जेष्ठ नागरिकमैत्री हिसाबमा निर्वाचन हुन्छ ।’
उनले निर्वाचनताका कतिपय मतदातालाई प्रलोभनमा पार्ने किसिमका गतिविधि नियन्त्रण गर्न मिडियाले पनि खबरदारी गर्नुपर्ने बताए ।
अन्तरक्रिया कार्यक्रममा विभिन्न सञ्चारमाध्यममा आवद्व सञ्चारकर्मीहरूले निर्वाचनताका सञ्चारमाध्यमले गर्नुपर्ने भूमिकाका विषयमा बोलेका थिए ।
आगामी ४ मंसिरमा हुने निर्वाचनका लागि सुनसरीमा रहेका चार निर्वाचन क्षेत्रमा अहिले दलहरूका उम्मेदवार घरदैलोमा छन् । उम्मेदवारले आचारसंहिता उल्लघंन गरेमा निर्वाचन आयोगलाई जानकारी गराउन अपिल गरिएको छ ।
Discussion about this post