इटहरी : इटहरीका सामाजिक व्यक्तित्व लेखनाथ घिमिरेलाई नागरिक अभिनन्दन गरिने भएको छ । सामाजिक, शैक्षिक र साहित्य क्षेत्रमा समेत प्रशंसित घिमिरेलाई आगामी माघ २७ गते अभिनन्दन गर्न लागिएको हो ।
घिमिरेको अभिनन्दनका लागि कवि अनिल पौडेलको संयोजकत्वमा समिति बनेको छ ।
ताप्लेजुङ साँघुमा जन्मिएर इटहरीमा कर्मथलो बनाएर बसेका घिमिरेलाई ७८ वर्ष उमेर पुगेका दिन अभिनन्दन गर्न लागिएको हो ।
यसअघि नागरिक स्तरबाट भाषाविद् प्राध्यापक डाक्टर टंक न्यौपाने र मजदुर नेता ओम कोइरालाई अभिनन्दन गरिएको थियो ।
शैक्षिक क्षेत्रको उन्नयनमा जीवनको उर्जा लगानी गरेका घिमिरेको अभिनन्दनकै क्रममा सयभन्दा बढी लेखकले लेखेका सामग्रीसहितको ग्रन्थ पनि प्रकाशन हुने भएको छ ।
ग्रन्थ प्रकाशसनका लागि सम्पूर्ण सामग्री तयारी भएको संयोजक पौडेलले बताए । उनका अनुसार समाजमा योगदान पु¥याउने अनि अग्रजलाई सम्मान गर्नका लागि नयाँ पुस्तालाई संस्कार सिकाउन पनि यस खाले नागरिक अभिनन्दनले सहयोग पुग्नेछ ।
इटहरीको इतिहास निर्माण गर्ने र भविष्यमा इतिहास बन्न सक्ने विविध क्षेत्रका व्यक्तिको पहिचान गरी नागरिक अभिनन्दन गर्ने योजना रहेको पौडेलले बताए ।
अभिनन्दनका क्रममा झाँकीसहित इटहरी बजार परिक्रमा गरिनेछ । घिमिरेलाई अभिनन्दन गर्न त्यसको तयारीका लागि मूल आयोजक समितिसँगै आर्थिक, प्रचारप्रसार, व्यवस्थापन लगायतका अलग–अलग समितिले युद्दस्तरमा काम गरि रहेको मुल समितिको सचिव सागर भट्टराईंले बताए ।
प्रचारप्रसारका लागि इटहरीलाई कार्यक्षेत्र बनाएर काम गर्ने सम्पूर्ण पत्रकारलाई प्रिन्ट, अनलाइन, रेडियो र टेलिभिजन विभाग छुट्याएर जिम्मेवारी प्रदान गरिएको छ ।
प्रचारप्रसार समितिले पत्रकारसँग बुधबार एक छलफल कार्यक्रम समेत आयोजना गरियो ।
सो क्रममा पत्रकार सुविद गुरागाईंले घिमिरेको नागरिक अभिनन्दनबारे चर्चा–परिचर्चा इटहरी कार्य क्षेत्र बनाएर काम गर्ने पत्रकारले सञ्चार गृहमा समाचार प्रकाशन–प्रशारण गरेसँगै सामाजिक सञ्जालमार्फत पनि गर्नुपर्ने बताए ।
कार्यक्रममा पत्रकार शालिग्राम पाण्डेले नागरिक अभिनन्दन वर्षेनी समाजिक क्षेत्रमा व्यक्तिगत स्वार्थमाथि उठेर काम गर्नेको पहिचान गरि गरिनुपर्नेमा जोड दिए ।
सो क्रममा लेखनाथ घिमिरे अभिनन्दन मूल समारोह समितिका संयोजक पौडेलले समाजको वृहत्तर हितमा लाग्ने पात्र पहिचान गरी सबैजनाले योजना बनाएरै अगाडि बढनुपर्ने आवश्यकता रहेको बताए ।
Discussion about this post