धनकुटा : धनकुटा नगरलाई सफा र सुन्दर बनाउन नगरक्षेत्रमा सरसफाई अभियान सुरु गरिएको छ ।
‘धनकुटा नगर सुन्दर, स्वच्छः समुन्नत सहर’ नारा लिएको नगरपालिकाले अभियान नै सञ्चालन गरेर नगरक्षेत्रको सरसफाई थालेको हो ।
अभियानको पहिलो दिन शनिबार पर्डेप नेपालसँगको सहकार्यमा बसपार्कसहित जिरोप्वाइन्ट, रमाइलो घुम्ती, परिचयमोड लगायत बजार तथा सडक क्षेत्रको सरसफाई गरिएको छ ।
सरसफाई अभियानको अगुवाई गर्दै नगर प्रमुख चिन्तन तामाङ आफै झाडु बोकेर सडक बढार्दै हिँडेका थिए ।
उनीसँगै प्रमुख जिल्ला अधिकारी लीला केसी, धनकुटा नगरपालिकाका प्रमुख प्रशासकीय अधिकृत रामबहादुर थापा, धनकुटा ७ का वडाध्यक्ष रोशेष श्रेष्ठ, जिल्ला प्रहरी प्रमुख एसपी कृष्णप्रसाद कोइराला, सशस्त्र प्रहरी प्रमुख डीएसपी दीपक बलामी, सल्लेरीस्थित नेपाली सेनाको भीमदल गणका गणपति सुमन थापा लगायत पनि सरसफाई अभियानमा कुचो बोकेर निस्किएका थिए ।
अब, नगरलाई थप सफा र सुन्दर बनाउन अभियानकै रुपमा सरसफाई गरिने धनकुटा नगरपालिकाका प्रमुख चिन्तन तामाङले बताए । ‘विभिन्न संघसस्था, सुरक्षा निकाय, नगरबासी लगायत सबैसँग सहकार्य गरेर सरसफाई अभियान थालेका छौं,’ नगर प्रमुख तामाङले भने, ‘धनकुटा नगरलाई अझै सफा र सुन्दर बनाउँन यो अभियानलाई निरन्तरता दिन्छौं ।’
धनकुटा नगरपालिकाले केही साता सचेतनामूलक सरसफाई अभियान सञ्चालन गरेर जथाभावी फोहोर नगर्न आग्रह गर्ने र त्यसपछि पनि अटेर गरेर जथाभावी फोहोर गर्नेलाई कारबाही गर्ने तयारी गरेको छ ।
जथाभावी फोहोर गर्नेलाई पाँच हजारदेखि ५० हजारसम्म जरिवाना गर्न सक्ने कानूनी व्यवस्था छ । चैत महिनाभर सचेतनामूलक सरसफाई अभियान सञ्चालन गरिने र अटेर गरेर जथाभावी फोहोर गर्नेलाई बैशाखबाट कानूनी कारबाही गरिने नगरपालिकाको वातावरण उपशाखा प्रमुख उपेन्द्र खनालले बताए ।
‘जथाभाबी फोहोर गर्नेलाई पाँच हजारदेखि ५० हजारसम्म जरिवाना गराउँन सक्ने कानूनी व्यवस्था भएपनि अहिलेसम्म त्यसमा कडाइ गरिएको थिएन, तर अब बैशाखबाट कडाइ गरिन्छ,’ खनालले भने ।
धनकुटा नगर, मुलुककै सफा सहरका रुपमा चिनिन्छ । २०७४ सालमा देशभरको सबैभन्दा सफा सहरका रुपमा धनकुटा नगरलाई सरकारले १० लाख नगदसहित पुरस्कृत गरेको थियो ।
धनकुटा नगरले हालसम्म नगर क्षेत्रका २ हजार ६ सय घरधुरीलाई फोहोर फाल्ने डस्टबिन वितरण गरेको छ । नगरका सार्वजनिक स्थानहरूमा पनि ९ सय ५० वटा डस्टबिन राखेर फोहोर संकलन गरी फोहोरमैला व्यवस्थापन केन्द्रमा लगेर फोहोर व्यवस्थापन गर्ने गरिएको छ ।
Discussion about this post