धरान : पछिल्लो समय आर्थिक समस्याका कारण देशमा लगानी गर्न निकै समस्या हुँदै आएको छ । तर, उद्योगी व्यवसायीहरू भने लगानी प्रबद्र्धन गर्नका लागि छलफलमा जुटेका छन् ।
सुनसरी उद्योग वाणिज्य संघमा आयोजित ‘पर्यटनको सम्भावना, चुनौती एवम् धरानमा आउँदै गरेको लगानीलाई स्वागत’ विषयक कार्यशाला गोष्ठीमा सहभागी उद्योगी एवम् व्यवसायीहरूले सुरक्षा, सरकारको व्यवसायिक नीति स्पष्ट नभएको बताएका छन् ।
धरान ४ स्थित भेडेटार नजिकै ६ अर्ब ४० करोड लगानीमा पाँचतारे होटलसहित टुरिस्ट भिलेज बनाउने तयारी गरिएको छ ।
सन् २०२६ सम्मा पाँचतारे होटलसहितको टुरिस्ट भिलेज सञ्चालन गर्ने लक्ष्यका साथ अहिले निर्माणको काम सुरु गरिएको धरानमा एक कार्यक्रम गरी जानकारी गराइएको छ ।
डिए इन्भेस्टमेन्ट प्रा.लि (डीएआई) को ५१ प्रतिशत लगानी र ४९ प्रतिशत हुन आउने २५ मिलियन अमेरिकी डलरको वैदेशिक लगानीमा टुरिस्ट भिलेज निर्माण बनाइन लागेको प्रालिका अध्यक्ष देवेन्द्र बजगाईँले जानकारी दिए ।
टुरिस्ट भिलेजमा लगानीका लागि १३ वटा वैदेशिक कम्पनी तयार भएको बजगाईँले बताए ।
पर्यटनका सम्भावना चुनौती एवम् धरानमा आउँदै गरेको लगानीलाई स्वागत विषयक कार्यशाला गोष्ठीमा उनले लगानीकर्ता वर्ल्डवाइड होल्डिङ कम्पनीले एक्सटेसन अफ इन्टरेस्ट भनेर पत्र पठाइसकेको जानकारी दिए । उनका अनुसार लगानी बोर्डसग यसबारे काम अगाडि बढेको छ ।
लगानीकर्ता कम्पनीले विगत एक वर्षदेखि यहाँ आएर विभिन्न पटक अनुगमन गरेको र टुरिस्ट भिलेजको योजनालाई सफल पार्न काम भइरहेको बताए ।
उनका अनुसार स्थानीय उत्पादनमा जोड दिने, कृषि तालिम, प्रशिक्षण र बजार प्रवर्द्धन गर्ने, मल, बीउमा लगानी गर्ने, पानीको समस्याको दीगो समाधानका लागि स्रोत र स्थानीय माटो, हावा, पानी, नागरिकको तत्कालीन अवस्था र उत्थान गर्न सकिने सम्भावित विषयको रिपोर्ट प्राप्त भएको, ल्याण्डस्केपको काम सकिएको छ ।
क्यासिनोसहितको संरचना निर्माण गरी विदेशी पर्यटक भित्र्याउने लक्ष्य लिएको यो परियोजनाको बिक्री समेत खुल्ला गरिने निर्माण कम्पनीको लक्ष्य रहेको बताइएको छ ।
छिमेकी मूलुक भारतका दुई राज्य बिहार र पश्चिम बङ्गालका ३० करोड जनसंख्यालाई प्राथमिक लक्ष्य राख्दै उक्त योजना ल्याइएको उनले बताए ।
पर्यटन क्षेत्रमा काम गरिरहेकाहरूको यस्तो धारणा
धरानको बिष्णुपादुकाबाट सञ्चालन हुने केबलकारको परियोजनाका विषयमा स्थानीय अजय राईले चाडैँ नै डिजिटल म्यापसँगै प्रस्तुति गरिने बताए ।
यस्तै, बराहक्षेत्रमा जलपर्यटनमा सक्रिय रहँदै आएका विमलमान श्रेष्ठले सुरक्षा चुनौतीलाई झेल्दै लामो समयदेखि सप्तकोसी नदीमा जेटबोट निरन्तर सञ्चालन गर्दै आएको बाए ।
कार्यक्रममा नेपाल एसोसिएसन र्याफ्टिङ्ग एजेन्सीका केन्द्रीय सदस्य तथा तमोर रिभर र्याफ्टिङ्गका सञ्चालक मदन ढकालले आँफूले सन् २००५ देखि सुरु गरिएको तमोर एडभेन्चर पूर्वका लागि पर्यटनको क्षेत्रमा लगानी गरिरहेको बताए ।
होटेल व्यवसायी महासंघ कोसी प्रदेशका महासचिव तथा सेछ होटल धरानका सञ्चालक बासु बरालले आँफूले लगानी गरेर एडभेन्चर
पार्क व्यावसाय सञ्चालन गरेको स्थानमा बाटोको असुविधाको कारण उक्त व्यवसाय धराशयी बनेको बताए ।
यस्तै, धरानमा हेलिकोप्टर सेवा सञ्चालन गर्ने धरान हेलिडोज प्रालिका प्रबन्ध निर्देशक अमृत मानन्धरले सेवा सञ्चालनको निमित्त एउटा हेलिपोटको अवधारणा ल्याउनुपर्ने बताए त्यस्तै, होटेल व्यावसायीहरूको तर्फबाट लोकेन्द्र श्रेष्ठले होटेल व्यावसाय पर्यटनसँग सम्बन्धित भएपनि अहिले बजारको अवस्था धराशयी रहेको बताए ।
पर्यटन प्रबद्र्धनका निम्ति टेवा
उक्त गोष्ठीमा धनकुटाको साँगुरीगढी गाउँपालिकाका अध्यक्ष जीतेन्द्र रुम्दालीले ठूलो परियोजनाले स्थानीय पर्यटन प्रबद्र्धनका निम्ति टेवा पुग्ने बताएका थिए ।
कार्यक्रमका प्रमुख अतिथि समेत रहेका धरान उपमहानगरपालिका मेयर हर्कराज राई (हर्क साम्पाङ) ले धरानलाई पर्यटन हब बनाउनको निमित्त सबै सरोकारवालासँग छलफल गरेर अगाडि बढ्नुपर्ने तर्क गरे ।
तराई र पहाडको स्थान जलमार्ग, हेलिकोप्टर केवुलकारको माध्यमबाट धरानलाई पर्यटकीय हब बनाउनुपर्ने उनले बताए ।
उवासंघ सुनसरीका अध्यक्ष विजय श्रेष्ठको अध्यक्षतामा सम्पन्न भएको कार्यक्रम महासचिव महेन्द्र प्रधानले सञ्चालन गरेका थिए ।
Discussion about this post