इटहरी : कोसी प्रदेश नामकरण विरुद्व आन्दोलनमा घाइते भएका एक युवकको मृत्यु भएको छ ।
गत चैत ५ गते विराटनगरस्थित मुख्यमन्त्री कार्यालय अगाडि कोसी प्रदेश खारेजीको माग राख्दै आन्दोलनमा सहभागी भएका ४२ वर्षीय पदम लिम्बू घाइते भएका थिए ।
घाइते भएका लिम्बूको उपचारको क्रममा धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको जिल्ला प्रहरी कार्यालय सुनसरीका डीएसपी राजकुमार राईले पुष्टि गरे ।
डीएसपी राईले टाकुरासँग भने, ‘आज राति निधन भएको भन्ने कुरा आएको छ, हामी पनि घटनाबारे थप बुझ्ने प्रयत्न गरिरहेका छौँ ।’
लाजेहाङ नामले परिचित रहेका लिम्बूको आज बिहान २ः३० बजे निधन भएको हो ।
लिम्बूवान भोलन्टियर्स केन्द्रीय सिनियर कमान्डर लिम्बूको आन्दोलनमा सशस्त्र प्रहरीको कुटाइबाट गम्भीर घाइते भएका थिए ।
प्रदेश १ सरकारले कोसी प्रदेश नामाकरण राखिएपछि पहिचान पक्षधर दलहरू आन्दोलनरत छन् । मोरङको लालभित्ती घर भएका लिम्बू धरान १५ मा बस्दै आएका थिए ।
विराटनगरको प्रदर्शनमा सशस्त्र प्रहरीले आन्दोलनकारी माथि निषेधित क्षेत्र नजिक अश्रुग्याँस प्रहार गरेको थियो ।
लगत्तै हवाई फायर गरेको प्रहरीसँग दोहोरो भिडन्तका बेला लाठी चार्जमा घाइते लिम्बुको टाउकोमा गम्भीर चोट परेको हो ।
टाउकोमा चोट लागेका उनले बान्ता गरेपछि अचानक बेहोस भएपछि उपचारार्थ वीपी प्रष्तिठान पुर्याइएको थियो चिकित्सकहरूले लिम्बूलाई तत्काल आइसियुमा भर्ना गराएपनि उनको होस खुल्न सकेको थिएन ।
Discussion about this post