धरान : धरानस्थित पीण्डेश्वर विद्यापीठ विद्यालयका उपप्राध्यापक गिरिराज खतिवडाले विद्यार्थीले चिट चोर्न नपाएपछि आँफूमाथि आक्षेप लगाइएको प्रष्टीकरण दिएका छन् ।
मंगलबार मापसे गरेको भन्दै विद्यार्थीले आरोप लगाएपछि उपप्राध्यापक खतिवडाले विद्यार्थीले चिट चोर्न नपाएपछि आँफूमाथि हुँदै नभएको आरोप लगाइएको बताएका हुन् ।
‘परीक्षा केन्द्राध्यक्षले अघिल्लै दिन बोलाएपछि म निरीक्षक गएको थिएँ,’ खतिवडाले भने, ‘परीक्षा लेखेपछि हामी कापी बुझाउन थाल्यौँ, एकजना विद्यार्थीले एकान्तमा बोलाएर लगे र गालीगलौज गर्न थाले ।’
आँफूले कुनै विद्यार्थीलाई अपशब्द नबोलेको र मापसे सेवन नगरेको उनले बताए । ‘विद्यार्थीहरुले चिट चोर्न पाएनन्, चिट चोर्न नपाएकै कारण आक्षेप लगाइयो,’ उनले भने, ‘सबै कुरा विद्यार्थीलाई खुलाउनुपर्छ भन्ने होइन, मेरो आशय विद्यार्थीहरूले परीक्षामा मनलाग्दी गर्नुहुँदैन भन्ने हो ।’
अहिले पीण्डेश्वर विद्यापीठमा शास्त्री शंकायको तीन वर्षे र चार वर्षे कोर्षको परीक्षा चल्दैछ । केही विद्यार्थीले स्ववियु चुनावको पनि पूर्वाग्रह राखेकाले आँफूमाथि दुव्र्यवहार भएको उनको भनाइ छ ।
यता, क्याम्पस प्रमुख काशीनाथ पौडेलले ७ बजेबाट सुरु हुने परीक्षामा उपप्राध्यापक खतिवडा ६ः३० बजे नै आएर अरु शिक्षकसरह खटिएको भएपनि व्यक्तिगत रूपमा अनावश्यक आरोप लगाइएको प्रतिक्रिया दिए ।
‘विद्यार्थीहरूले घेरेर ‘खाको भन् हो कि होइन, स्वीकार गर्’ भनेर कर गरेपछि आजित भएर हो भनिएको देखिन्छ,’ उनले भने, ‘के खाएको भन्ने खुलेको छैन, उहाँ लगायत अरु चारजना सरहरू निरीक्षक हुनुहुन्थ्यो, विद्यार्थीबाटै उहाँ (खतिवडा) माथि चरित्र हत्याको काम भयो ।’
परीक्षालाई मर्यादित र व्यवस्थित ढंगले सञ्चालन गर्दा विद्यार्थीबाट दुव्र्यवहार भएको उनले बताए ।
‘व्यक्तिका स्वभाव हुन्छन्, कोही नरम र कोही कडा प्रकृतिका हुन्छन्, आफ्नो काम गर्ने काममा खतिवडा सर कडा स्वभावसाथ ड्यूटीमा खट्नुभयो होला स्वभाविक हो,’ पौडेलले भने, ‘उहाँ अलिक कडा मिजासको मान्छे हो, परीक्षाको कापी बुझाएपछि बाहिर निस्किएर विद्यार्थीबाट यो किसिमको व्यवहार हुनु आपत्तिजनक हो ।’
Discussion about this post