इटहरी : इटहरी उपमहानगरपालिका ४ स्थित कचना महादेव माध्यमिक विद्यालयमा अध्ययनरत सुवास दमाई तेक्वान्दो विधाको राष्ट्रिय खेलाडीमा छनौट भएका छन् ।
विद्यालयको कक्षा ७ मा अध्ययनरत दमाई तेक्वान्दो एसोसियसन अफ नेपाल (टान) द्वारा आयोजित छनौट प्रतियोगितामार्फत् ३३ किलो तौल समूहतर्फ देशकै सर्वोत्कृष्ठ खेलाडीका रुपमा छानिएका हुन् ।
दमाईले देशका विभिन्न जिल्लाबाट प्रतिस्पर्धामा सहभागी हुन आएका आफ्नो तौल समूहका ६९ जना प्रतिस्पर्धीलाई पछि पार्दै राष्ट्रिय खेलाडीका रुपमा आफ्नो नाम लेखाउन सफल भएको विद्यायलका प्रधानाध्यापक हरिशंकर घिमिरेले जानकारी दिए ।
दुई वर्षदेखि तेक्वान्दो खेलमा अभ्यासरत दमाईले पहिलो प्रयासमै राष्ट्रिय टिममा स्थान बनाएको प्रअ घिमिरेले उल्लेख गरे ।
मोरङको गोठगाउँ मुल घर भएका १३ वर्षीय राष्ट्रिय खेलाडी दमाई आफू दिदीभिनाजुसँग इटहरीको पशुपति चौकमा डेरा गरी बस्दै आएको बताउँछन् ।
गाउँमा बाबु बिरामी भई काम गर्न सक्ने अवस्थामा नरहेकाले घरव्यवहार चलाउन समस्या भएपछि हाल आमा वैदेशिक रोजगारीमा युएईको दुबईमा कार्यरत रहेको उनले सुनाए ।
आमाले पठाएको रेमिट्यान्सबाटै आफू र बाबुको खर्च चल्दै आएको बताउँदै उनले आफू भने खेल र पढाइलाई निरन्तरता दिने उद्देश्यले दुवै विषयलाई बराबर प्राथमिकतामा राखेर अगाडि बढिरहेको उल्लेख गरे ।
मोरङको उर्लाबारीमा रहेको सरस्वती मा.वि. मा कक्षा ५ सम्मको अध्ययन सम्पन्न गरी कचना मा.वि. प्रवेश गरेका दमाईको पढाइ र खेल दुवैतर्फ प्रदर्शन राम्रो रहेको विद्यालयको लेखा शाखाका कर्मचारी सरोज महल्दारले जानकारी दिए ।
उनका अनुसार कक्षा ६ को वार्षिक परीक्षामा २.७१ जीपीए ल्याएका दमाई हाल आफ्नो कक्षामा तेस्रो स्थानमा रहेका छन् ।
यसैबीच, आफ्नो विद्यालयमा अध्ययनरत दलित छात्रले राष्ट्रिय खेलाडीमा छनौट भई वडाको गौरव बढाएको भन्दै विद्यालयले एक समारोहको आयोजना गरी खेलाडी दमाईलाई सम्मानसमेत गरेको छ ।
आफ्नो विद्यालयका छात्र राष्ट्रिय खेलाडीका रुपमा छनौट हुनु गर्वको विषय भएकाले छनौट हुने खेलाडीको हौसला बढाउँदै उत्तरोत्तर प्रगतिको शुभकामनासहित सम्मान गरिएको प्रअ घिमिरेले जानकारी दिए ।
२०३९ सालमा विद्यालयकी संस्थापक प्रधानाध्यापक राधा खनालको एकल प्रयासमा सामान्य पूर्वाधार र केही विद्यार्थीसहित सञ्चालनमा आएको कचना महादेव मा.वि.ले हालसम्म थुप्रै विधामा अब्बल जनशक्ति तयार गरी राष्ट्रिय महत्वका विभिन्न क्षेत्रमा पठाएको विद्यालयले जनाएको छ ।
Discussion about this post