आकाश इन्स्टिच्युटद्धारा एसईई दिएका विद्यार्थीहरूलाई शैक्षिक परामर्शसँगै विदाई

इटहरी : इटहरीको आकाश इन्स्टिच्युटले एसईई दिएर उच्च शिक्षा अध्ययन गर्न लागेका विद्यार्थीहरूलाई शैक्षिक परामर्श दिएसँगै विदाई गरेको छ ।

बुधबार एक कार्यक्रमबीच इटहरीमा इन्सिच्युटले विदाई कार्यक्रमको आयोजना गरेको हो ।

कार्यक्रमकी प्रमुख अतिथि सुनसरीकी प्रमुख जिल्ला अधिकारी हुमकला पाण्डेले विद्यार्थीहरूले एसईई उत्तीर्ण भएपछि जुनसुकै विषय र जुनसुकै कलेज पढेपनि आफ्नो लक्ष्या बिर्सन नहुने बताइन् ।

‘तपाईँहरू जुनै कलेज पढ्नुहोस्, जुनै विषय पढ्नुहोस्, तर आफ्नो लक्ष्य नबिर्सिनुहोस्,’ प्रजिअ पाण्डेले भनिन्, ‘अहिलेका किशोरावस्थाका मानिसहरूमा धैर्यता र प्यासनको एकदमै कमी छ, मानिसले आफ्नो लक्ष्य पूरा गर्नका निम्ति धैर्यता र प्यासन हुन आवश्यक छ ।’

उनले अहिले किशोरावस्थामा छिट्टै पैसा कमाउनुपर्ने, पदमा पुगिहाल्नुपर्ने, अनैतिक सम्बन्ध राख्ने, मादक पदार्थ र लागूपदार्थ सेवन गर्ने जस्ता घटना बढिरहेकाले सचेत हुन समेत उनको आग्रह थियो ।

‘सुन्दर भविष्य रचना गर्न म को हुँ भन्ने जान्न आवश्यक छ । बोर्डिङले भित्र जस्तो भएपनि बाहिर राम्रो देखाउनुपर्ने अवस्था छ,’ उनले भनिन्, ‘म २३ वर्षकै उमेरमा मास्टर डिग्रीका विद्यार्थीलाई पढाउँथे, आँफूले आफ्नो लक्ष्यलाई साथै राखेर हिँड्नुपर्छ ।’

आँफू एक परिवारको छोरी, श्रीमती, बुहारी र आमा भएपनि आफ्नो काममा कटिबद्ध भएको उनले सुनाइन् ।

कार्यक्रममा आकाश इन्सिच्युटका कार्यकारी सञ्चालक गोपाल निरौलाले शैक्षिक दायरा फराकिलो बनाउन आँफूहरूले शैक्षिक परामर्श दिइरहेको बताए ।

उच्च शिक्षा अध्ययन गर्दा कुन विषय र कुन ठाउँमा अध्ययन गर्ने भन्ने विषयमा अध्ययनका क्रममा प्रष्ट पारिएको उनले बताए ।

‘हामीले विकट ठाउँबाट आएका, शारीरिक अशक्त विद्यार्थीहरूलाई छात्रवृत्ति प्रदान गरेर अध्यापन गराउँदै आएका छौँ,’ निरौलाले भने, ‘खासगरी हामीले नेपालमै अध्ययन गर्न चाहने वा विदेश गएर उच्च शिक्षा हाँसिल गर्न चाहने विद्यार्थीलाई पनि अध्ययनमा सहजीकरण गर्दै आएका छौँ ।’

कार्यक्रममा इटहरी उपमहानगरपालिका वडा नं. ६ का वडाध्यक्ष दिवस पोखरेल, हिसान केन्द्रीय सदस्य बलराम पन्त, मुकुन्द घिमिरे, प्रदेश उपाध्यक्ष गणेश दुलाल, प्याब्सन सुनसरी उपाध्यक्ष नेलशल ढकाल, अनन्त सुवेदी, खेमराज बास्तोला, केशव खड्का लगायतका शिक्षाकर्मीहरूले बोलेका थिए ।

उनीहरूले इटहरी शैक्षिक हब बन्दै गएको र इटहरीले जुनसुकै विषय पढाउन पनि सक्षम भएको बताएका थिए । कार्यक्रम इन्स्टिच्युटका कमल तिम्सिनाको अध्यक्षतामा सम्पन्न भएको थियो ।