कवि मनु मञ्जिलको टिप्पणी – ‘इटहरीमा नागरिक समाज राजनीतिक दलहरूको दास भयो’

इटहरी : इटहरी उपमहानगरपालिकाले भूमि करमा तीन सय प्रतिशतभन्दा बढी वृद्वि गरेको विरोधमा २५ दिनयता हरेक दिन विरोध गर्दै आएको राष्ट्रिय स्वतन्त्र पार्टी (रास्वपा) ले  आइतबार उपमहानगरअगाडि कोणसभा गरेको छ ।

कोणसभा गर्दै रास्वपाले इटहरीको नागरिक समाज राजनीतिक दलहरूको दास भएको ठहर गरेको छ ।

केही समयअघि मात्रै रास्वपा प्रवेश गरेर कवि मनु मञ्जिलले कार्यक्रमलाई इटहरीमा रहेको नागरिक समाज राजनीतिक दलहरूको दास भएको टिप्पणी गरे ।

उनले इटहरी उपमहानगरले जनतालाई ढाड सेक्नेगरी बढाएको भूमिकरको विषयमा नागरिक समाज मौन भएको बताए ।

‘नागरिकको दुःखमा नबोल्ने नागरिक समाज राजनीतिक दलहरूको दास भएको ठहर गर्न सकिन्छ,’ उनले भने, ‘आर्थिक मन्दिको चपेटामा अवैज्ञानिक ढंगले बढाएको कर वृद्विले इटहरीका नागरिक आजित भएका छन्, यस विषयमा नागरिक समाज मौन छ ।’

कोणसभालाई सम्बोधन गर्दै प्रा.डा बद्रीविशाल पोखरेलले जनताको भावना विपरीत कर वृद्वि भएकोमा आपत्ति जनाए ।

इटहरीका बुद्विजीवीहरूसहितको उपस्थितिमा रास्वपाले कोणसभा आयोजना गरेको थियो । रास्वपाका स्थानीय तथा प्रदेश स्तरका नेताहरूको उपस्थिति रहेको थियो ।