इटहरी : इटहरीमा ज्येष्ठ नागरिक समाजले लोप हुँदै गएको सिलोक, संगिनी र विरहन गायनसहित नृत्य प्रस्तुत गरेको छ ।
विभिन्न चरणमा गरी गरिएको कार्यक्रमको शनिबार समापन गरियो । समापन कार्यक्रममा उत्कृष्ट हुनेहरूलाई पुरस्कृतसमेत गरिएको छ ।
बालाजी ज्येष्ठ नागरिक समाज इटहरी १६ को आयोजनामा भएको कार्यक्रममा १४ विधामा सिलोक र संगिनीसहित १० विधामा विरहन गाइएको थियो ।
सिलोकतर्फ इटहरी ५ का जीतबहादुर तामाङ प्रथम भए । यस्तै, इटहरी ७ का विष्णुबहादुर कोेइराला द्वितीय, इटहरी ५ का नन्दमणी बस्नेत तृतीय र इटहरी १६ का मोहनप्रसाद आचार्य शान्तवना भए ।
यसैगरी संगिनीतर्फ इटहरी २० प्रथम, इटहरी ५ द्वितीय, इटहरी १६ तृतीय, इटहरी १९ र इटहरी ३ शान्तवना भएको छ ।
यस्तै, चौधरी भाषाको विरहनतर्फ भने इटहरी १२ प्रथम, इटहरी १६ द्वितीय, इटहरी १४ तृतीय, इटहरी १५ शान्तवना भएको छ । उत्कृष्टहरूलाई पुरस्कारसमेत प्रदान गरियो ।
खासगरी पछिल्लो समय यी पुराना संस्कृतिहरू लोप हुँदै गएकाले पनि जेष्ठ नागरिकमा एउटा नयाँ उर्जा थप्नका निम्ति यस्ता कार्यक्रमको आयोजना गरेको बताइन्छ ।
कार्यक्रम संयोजक कृष्णविनोद लम्सालले सिलोक, संगिनी र विरहन गाउन, नाच्न जानेपनि देखाउने ठाउँ नभएकाले यो किसिमको कार्यक्रम आयोजना गरेको बताए ।
‘प्रायजसो: ७० वर्षभन्दा माथिका ज्येष्ठ उमेरका मानिसहरूले गरेको यो कार्यक्रमले हामीलाई थप उर्जा बढाएको छ,’ उनले भने, ‘समाजलाई जोड्न पनि यस्ता कार्यक्रम आवश्यक छ । हामीले वर्गीय हित र वर्गीय चेतका निम्ति यो कार्यक्रम आयोजना गरेका हौँ ।’
उनले ‘ज्येष्ठ नागरिकका अन्तहृदयको झङ्कार, नयाँ पुस्तालाई वरद–उपहार’ भन्ने सन्देशका साथ नयाँ पुस्तालाई पनि पुराना संस्कृतिबारे जानकार गराउन कार्यक्रमको आयोजना गरिएको बताए । उनले यसअघि विभिन्न चरणमा जेष्ठ नागरिकहरूलाई प्रतियोगितामा सहभागी गराइएको थियो ।
आयोजक कमिटिका सचिव नरेन्द्र धितालले जेष्ठ नागरिकमा भएको प्रतिभा छनौट गर्नका निम्ति यो कार्यक्रमले सहज बनाएको बताए । कार्यक्रममा ज्येष्ठ नागरिकहरूले आफ्ना प्रतिभासमेत प्रष्फुटन गरेका थिए ।
लोप हुँदै गएको प्रतिभा नयाँ पुस्तालाई पनि सन्देश दिनेगरी प्रस्तुत गरिएको थियो । जसकारण ज्येष्ठ नागरिकहरूको मुहारमा खुशीको झल्को देखिन्थ्यो ।
Discussion about this post