बराहक्षेत्र : सुनसरीको बराहक्षेत्रस्थित स्वर्णिम साहित्य समाजको आयोजनामा कवि पराजित पोमुको एकल कविता वाचन आयोजना भएको छ ।
समाज स्थापनाको चौंथो वार्षिकोत्सवमा कवि पोमुको एकल कविता वाचन आयोजना गरिएको हो ।
कवि पोमुले उनको पहिलो कविता सङ्ग्रह ‘लेप्मुहाङको डुङ्गा’ र दोस्रो कविता सङ्ग्रह ‘मद्वारा मेरो निर्माण’ मा सङ्ग्रहित दर्जन बढी कविता वाचन गरे ।
‘असहमति’ शीर्षकको कविताबाट सुरु गरिएको एकल कविता वचनमा उनले ‘साधारण मान्छे’, ‘सुधार गृहको आवाज’, ‘अविभाज्य पूर्णता’, ‘ॐ मणि पेमे’, ‘राम्रो म’, ‘फिलिङ्गो फूल’, ‘हिउँ परेको रात’, ‘मद्वारा मेरो निर्माण’ शीर्षकका कविता वाचन गरेका थिए ।
कविता वाचनमा स्थानीय कविहरू नदी राई (मिसाम), सविता फागो र वर्षा भण्डारीले कवि पोमूको कविता वाचनमा सहयोग गरेका थिए ।
कविता वाचनपछि कवि देवान किरातीले टिप्पणी गर्दै सांस्कृतिक चिन्तन, मुन्धुम संस्कृति र संस्कारको आलोकमा सिर्जित स्थानीय र मौलिक कविताहरूको बाहुल्यता रहेको बताए । कविले राजनीतिक दलको भातृसङ्गठनजस्तो समूह खोज्दै हिँडेको बताए ।
‘हाम्रो समयमा अग्रजले कविता लेखेको भएन भन्दा हामी सुधार गर्थ्यौ, अहिलेका कविलाई कविता भएन भन्यो भने ढुंगा हान्छ्न्,’ उनले भने, ‘बाह्यरुप कला हो । भित्री रुप आत्मा हो, जुन भाव हो, विचार हो । यो भएन भने कवितामा दम हुँदैन ।’
कवितामा कवि पोमूले भाषा, शब्दको निर्माण गरेको बताए ।
साधारण सभामा समाजका अध्यक्ष प्रकाश दिप्सालीले प्रस्तुत गरेको अध्यक्षको प्रतिवेदन र कोषाध्यक्ष शारदा निरौला सारुले प्रस्तुत गरेको कोषाध्यक्षको प्रतिवेदन पारित भएको थियो ।
साधारण सभाले कोषाध्यक्ष सारुलाई योगदानको उच्च मूल्याङ्कन गर्दै नगदसहित सम्मानसमेत गरेको थियो ।
Discussion about this post