इटहरी : कोसी प्रदेशका मुख्यमन्त्री हिक्मत कार्कीले राजीनामा दिएसँगै कसको नेतृत्वमा सरकार बनाउने भन्नेबारे रस्साकस्सी सुरु भएको छ ।
अहिले दलहरू कसको नेतृत्वमा सरकार बनाउने भन्नेबारे निर्णय गर्नका निम्ति काठमाडौँमा छन् । कोसी प्रदेशमा कांग्रेस र माओबादीले आ–आफ्नै दाबी गरिरहेका छन् ।
गत भदौ २२ गते सर्वोच्च अदालतको परमादेशबाट मुख्यमन्त्री नियुक्त भएका कार्कीले गत शनिबार प्रदेश प्रमुख परशुराम खापुङसमक्ष राजीनामा बुझाएसँगै गठबन्धन दलहरूबीच कसको नेतृत्वमा सरकार बनाउने भन्नेबारे छलफलसँगै शीर्ष तहमा रस्साकस्सी गर्न थालेका छन् । प्रदेश प्रमुख खापुङले सरकार बनाउनका निम्ति आगामी शुक्रबार सँझसम्मको समय दिएका छन् ।
प्रदेश प्रमुखबाट सरकार गठनको आह्वान गरेको मितिभित्र सरकार बनाउनेगरी छलफल भइरहेको नेपाली कांग्रेस कोसी प्रदेशका प्रमुख सचेतक भूपेन्द्र राईले बताए ।
‘सरकार निर्माणका लागि हाम्रो पनि दाबी रहेको छ । सहयात्री दलहरूबीच पनि छलफल जारी छ,’ राईले भने, ‘कांग्रेसको दाबी रहिरहँदा सहयात्री दलहरूको पनि कुरा रहन्छ । शीर्ष नेतृत्वको पनि इच्छा हुन्छ ।’
उनले कोसी प्रदेश सरकार गठनका लागि केन्द्रीय नेतृत्वको पनि इच्छा हुने संकेत गरे । कांग्रेसमा संसदीय दलको नेताबाहेक मुख्यमन्त्री बन्ने कुरा मिडियामा आइरहँदा त्यो सम्भावना नरहेको बताए ।
‘कांग्रेसमा संसदीय दलको नेताबाहेक मुख्यमन्त्री बन्ने कुरा मिडियामा चैँ आउँछ,’ उनले टाकुरा न्यूजसँग भने, ‘संसदीय दलका नेताबाहेक मुख्यमन्त्री बन्नेकुरा सम्भावना कम छ ।’
उनले यदि कांग्रेसको नेतृत्वमा सरकार बने संसदीय दलका नेता उद्वव थापा नै मुख्यमन्त्री हुने बताए । खासगरी कांग्रेसको विधानअनुसार संसदीय दलको नेता नै मुख्यमन्त्री हुने प्रावधान छ । तर, संविधानको धारा १६८ (५) अनुसार सरकार गठन हुनेछ ।
उपधारा ५ अनुसार सरकार गठन हुने भएपछि जो सुकैले पनि मुख्यमन्त्रीमा दाबी गर्न पाउँछ । जसअनुसार कांग्रेसमा पनि अरु सांसदहरूले दाबी गरेको कुरा मिडियामा आइरहेका छन् ।
यसअघि सञ्चारकर्मीहरूसँग कुरा गर्दै कांग्रेस संसदीय दलका नेता तथा पूर्व मुख्यमन्त्री उद्वव थापाले भने, ‘अब मुख्यमन्त्री बन्न दलको नेता जरुरी छैन । तर दल त छ, दलको निर्णय त हुन्छ नि । दल मात्र छैन, गठबन्धन पनि छ । गठबन्धन तोडेर हामी मुख्यमन्त्री बन्न जान्छौं ?’
उनले यसअघि आँफू मुख्यमन्त्री बनेपनि काम गर्ने अवसर नपाएको बताएका थिए ।
‘दाबी मेरो पनि छ । तर, नेतृत्व कसले गर्ने भन्ने विषयमा शीर्ष नेताहरूले टुंगो लगाउनुहुन्छ । गठबन्धनको निर्णयलाई हामीले कार्यान्वयन गर्छौँ,’ उनले भने, ‘दलको नेता बाहेक मुख्यमन्त्री बनाउने विषयमा किन तयार हुने ? दलभित्र अनुशासन हुन्छ । विधान अनुसार दल चल्छ ।’
कोसी प्रदेशमा संविधानको धारा १६८ (५) अनुसार सरकार गठनका लागि गठबन्धनसँग बहुमत छ । तर, कसको नेतृत्वमा सरकार बनाउने भन्नेबारे यकिन भइसकेको छैन ।
कूल ९३ जना सांसदमध्ये नेकपा एमालेका ४० (उपसभामुखसहित), कांग्रेसका २९, माओवादीका १३, राप्रपाका ६, नेकपा एकीकृत समाजवादीका ४ र जसपाका १ सांसद छन् । बहुमतका लागि ४७ सदस्य आवश्यक पर्छ ।
यसैबीच प्रदेश सांसद तथा विराटनगरका पूर्व मेयर भीम पराजुलीले पूर्वप्रधानमन्त्री तथा नेपाली कांग्रेसका सभापति शेरबहादुर देउवासँग भेट गरेका छन् । देउवाले कोसी प्रदेशको मुख्यमन्त्री दलको नेता नै हुने बताएको पराजुलीले प्रतिक्रिया दिए ।
आफूलाई मुख्यमन्त्री बनाउन प्रस्ताव लिएर भेट गर्न पुगेका कांग्रेसका केन्द्रीय सदस्यसमेत रहेका पराजुलीलाई सभापति देउवाले दलको नेता नै मुख्यमन्त्री हुने बताएका हुन् ।
‘सभापतिज्यूसँग मैले कोसी प्रदेशको विषयमा कुरा गरें । पार्टीभित्र आइरहेको फलानो, चिलानो भन्ने जुन आइरहेको छ नि त्यो विषयमा पार्टीलाई मिलाएर जानुपर्छ भनेर मैले भने’ पराजुलीले भने, ‘सभापतिले मुख्यमन्त्री बन्दा संस्थागत रूपमा बन्छ । कांग्रेसबाट बन्ने भयो भने जो संसदीय दलको नेता छ त्यही हुन्छ । अरु हुँदैन भन्नुभयो ।’
Discussion about this post