इटहरी : संविधानको धारा १६८ (५) बमोजिम एमालेको सहयोगमा कोसी प्रदेशको मुख्यमन्त्री बनेका केदार कार्कीलाई मन्त्रीपरिषद् विस्तार गर्न सकस परेको छ ।
कांग्रेसका डा. शेखर कोइराला समूहका कार्कीले केन्द्रीय गठबन्धनको निर्णयलाई लत्याउँदै एमालेको समर्थनमा मुख्यमन्त्री बनेका थिए ।
तर, मुख्यमन्त्री नियुक्त भएको दुई साता बितिसकेको भएपनि मन्त्रीपरिषद् विस्तारमा सकस परेको हो ।
केन्द्रीय सत्ता गठबन्धनका शीर्ष नेताहरूको निरन्तरको दबाबका कारण उनले कोसी प्रदेशमा मन्त्रीपरिषद् विस्तार गर्न नसकेको उनी निकटका एक नेताले बताए ।
दसैँ अगाडि नै मन्त्रीपरिषद् विस्तारको तयारी भएपनि शीर्ष नेताहरूको दबाबका कारण उनले अहिले सम्म मन्त्रीपरिषद् विस्तार गर्न सकेका छैनन् ।
मुख्यमन्त्री नियुक्त भएलगत्तै उनले एमालेका राम राना र कांग्रेसका समशेर राईलाई विना विभागीय मन्त्री नियुक्त गरेका छन् ।
एमालेसँगको सहकार्य तोड्न निरन्तर केन्द्रबाट दबाब आएपछि कोसी प्रदेशको सत्ता सहयात्री एमालेलाई मन्त्रीपरिषद् विस्तारका लागि समय माग गर्दै थप छलफलका लागि मुख्यमन्त्री कार्की काठमाडौँ गएका छन् ।
उनले एमालेसँगको भेट र छलफलमा भने एमालेको माग र सर्तभन्दा विपरीत गएर मन्त्रीपरिषद् विस्तार नगर्ने प्रतिबद्धता जनाए ।
दसैँ बिदाका बेला एमाले कोसी प्रदेश संसदीय दलका नेता हिक्मत कार्कीसँगको भेटमा मुख्यमन्त्री कार्कीले एमालेसँगको सहकार्य आफूले तोड्न नसक्ने भन्दै नेताहरूसँग छलफलका लागि समय माग गरेका थिए ।
एमाले कोसी प्रदेश संसदीय दलका प्रमुख सचेतक रेवतीरमण भण्डारीले भने, ‘यदि मन्त्री परिषद् विस्तारमा माओवादीलाई पनि सामेल गराइए हामी सरकारमा बस्दैनौँ।’
मुख्यमन्त्री कार्की काठमाण्डौँबाट फर्किएपछि थप छलफल गरेर मन्त्रीपरिषद्को टुङ्गो लाग्ने जनाए ।
एमालेले माओवादीलाई भने सरकारमा सहभागी नगराउन माग राख्दै आएको छ ।
तर, कोसी प्रदेशमा राप्रपाबाहेक सबै दलले मुख्यमन्त्री कार्कीलाई विश्वासको मत दिएपछि सरकार विस्तार गर्न सकस भएको बताइदैँ आएको छ ।
Discussion about this post