विराटनगर : कोसी प्रदेशका मुख्यमन्त्री केदार कार्कीले सङ्घीय सरकारसँग सहकार्य मात्रै नभई सङ्घर्ष पनि गर्ने बताएका छन् ।
मङ्गलबार विराटनगरमा आयोजित स्थानीय तहहरूको असल अभ्यास आदानप्रदान कार्यक्रमको उद्घाटन समारोहमा बोल्दै मुख्यमन्त्री कार्कीले यस्तो बताएका हुन् ।
संविधानको कार्यान्वयन सही ढङ्गले गर्नुपर्नेमा जोड दिदैँ मुख्यमन्त्री कार्कीले भने, ‘जबसम्म हामी पुरातन सोचमा हुन्छौँ, तबसम्म हामी अगाडि बढ्न सक्दैनौँ । हामीले के गर्ने हो भन्ने कुराको योजनाका साथ जानुपर्ने हुन्छ । त्यसैले अहिलेको सरकारले संघ सरकारले समन्वयमात्रै नभइ आफ्ना अधिकारहरू स्थापित गर्न सङ्घर्ष पनि गर्दछ ।’
मुख्यमन्त्री कार्कीले सरकारका संयन्त्रहरू दीगो विकासका लक्ष्यअनुसार काम गर्नुपर्ने बताए ।
‘हामीले काम सुरु गरिसकेका छौँ, कनिकासरी बजेट छर्ने परिपाटी अन्त्य गर्दैछौँ, प्रदेशले कति सम्मका कार्यक्रम गर्ने, संघले कति र स्थानीय तहले कति गर्ने भन्ने कुरामा मापदण्ड बनाउनुपर्छ,’ उनले भने, ‘जसकारण संघ सरकारले पनि साना योजनामा बजेट नछरोस्, प्रदेशले साना योजना कटौती गरिसकेको छ ।’
सङ्घीय मामिला तथा सामान्य प्रशासनमन्त्री अनिता देवीको प्रमुख आतिथ्यमा भएको कार्यक्रमको सभापतित्व मुख्यमन्त्री कार्कीले गरेका थिए । मन्त्री देवीले तीनै तहको सरकारबीच समन्वय भएमात्र विकासले गति लिनसक्ने बताइन् ।
उनले भनिन्, ‘स्थानीय सरकारले अब कसरी अगाडि बढ्ने भनेर एउटा रोडम्याप बनाउन जरुरी छ ।’
प्रदेशका प्रमुख सचिव डा. दीपक काफ्लेले कतिपय संघीय कानुन निर्माण हुन नसक्दा साझा अधिकार सूचीमा रहेका अधिकारहरुको प्रयोग हुन नसकेको बताए ।
कार्यक्रममा विराटनगर महानगरका मेयर नागेश कोइराला, प्रदेश योजना आयोगका उपाध्यक्ष पुरञ्जन आचार्य, विभिन्न स्थानीय तहका प्रमुख तथा प्रतिनिधि तथा सरोकारवाला निकायका प्रतिनिधिहरूको सहभागिता रहेको थियो ।
Discussion about this post