मोरङ : पूर्व–पश्चिम राजमार्गअन्तर्गत मोरङको बेलबारीमा टिपर, बस र बोलेरो जीप ठोक्किएर दुर्घटना भएको छ । बेलबारी नगरपालिका १ र ३ को सिमानामा शुक्रबार (आज) बिहान दुर्घटना हुँदा दुईजनाको मृत्यु भएको छ भने तीनजना घाइते भएका छन् ।
पश्चिमबाट पूर्वतर्फ जाँदै गरेको प्रदेश १–०२–००१ ख ९६७६ नम्बरको टिपरले पश्चिमतर्फ विपरीत दिशाबाट आउँदै गरेको बागमती प्रदेश ०३–००१ ख २७१८ नम्बरको बसलाई ठक्कर दिएको थियो । बसलाई ठक्कर दिएपछि अनियन्त्रित बनेको टिपरले पूर्वबाट पश्चिमतर्फ नै आउँदै गरेको मे १ ज २८५६ नम्बरको बोलेरोलाई ठक्कर दिएको प्रहरीले जनाएको छ ।
प्रहरीका अनुसार दुर्घटनामा परेर बोलेरोमा सवार झापाको कमल गाउँपालिका २ का ५१ वर्षीय यदुकान्त भट्टराई र कमल गाउँपालिका ४ की ४४ वर्षीया दीपा खानालको मृत्यु भएको छ।
दुवै जनालाई उपचारका लागि विराटनगरस्थित कोसी अस्पताल लगिएको थियो । अस्पताल पुर्याउनसाथ चिकित्सकले मृत घोषित गरेको प्रहरीको भनाइ छ ।
दुर्घटनामा तीनजना घाइते भएका छन् ।
झापाको कमल गाउँपालिका २ की ५० वर्षीया गायत्री भट्टराई, सोही ठाउँका का ५५ वर्षीय हरि खनाल र तत्काल पहिचान नखुलेका अन्दाजी ४० वर्षीया पुरुषको न्यूरो अस्पताल विराटनगरमा उपचार भइरहेको जिल्ला प्रहरी कार्यालय मोरङले जनाएको छ ।
मृतक र घाइते सबै बोलेरो जीपमा सवार रहेको प्रहरीको भनाइ छ ।
प्रहरीका अनुसार दुर्घटनामा परेर बोलेरो जीप पूर्णरूपले क्षतिग्रस्त बनेको छ। बसमा सवार सबै जना सकुशल रहेको प्रहरीको भनाइ छ।
दुर्घटनालगत्तै टिपर चालक मोरङको सुन्दरहरैँचा नगरपालिका ७ का २३ वर्षीय चन्द्रबहादुर विक र बस चालक सुन्दरहरैँचा १२ का ४५ वर्षीय छत्रकुमार मास्केलाई नियन्त्रणमा लिएर थप अनुसन्धान सुरु गरिएको प्रहरीले जनाएको छ ।
Discussion about this post