धनकुटा : धनकुटा नगरपालिका १० स्थित पोखरीमा डुबेर मृत्यु भएका दुई बालकका परिवारलाई १५ लाखका दरले क्षतिपूर्ति उपलब्ध गराइने सहमति भएको छ ।
स्थानीय विजय पोल्टी फर्मको फोहोर वस्तुसहित पानी जम्ने पोखरीमा डुबेर धनकुटा १० का ११ वर्षीय मनिष खतिवडा र वडा ९ का १५ वर्षीय दिपेश ओझाको शनिबार मृत्यु भएको थियो ।
फर्मले लापरवाहीपूर्वक पोखरी बनाएका कारण घटना भएको जनाउँदै स्थानीयले विरोध गरेका थिए ।
मृतक बालकद्वयका अभिभावक, फर्मका सञ्चालकसहित जनप्रतिनिधि, प्रशासनलगायतको उपस्थितिमा बालकका परिवारलाई १५–१५ लाख रुपैयाँका दरले क्षतिपूर्ति उपलब्ध गराउन सहमति भएको धनकुटा–९ का वडाध्यक्ष टंक रोइलाले बताए ।
उक्त रकम आगामी बैशाख पहिलो साताभित्र उपलब्ध गराउने लिखित सहमति भएको छ । यस्तै, मृतकहरूको दाहसंस्कारलगायतका सम्पूर्ण खर्च समेत फर्मले उपलब्ध गराउने भएको छ ।
पोल्टी फर्मको फोहोर पानी मिसिएको दलदल पोखरीमा डुबेर बालकहरूको मृत्यु भएको प्रहरीले जनाएको छ ।
Discussion about this post