इटहरी : इटहरीमा डेढ वर्षीया बालिकाको हत्या भएको छ । शनिबार (आज)दिउँसो ३ः४० बजेतिर इटहरी ५ पचरुखीस्थित एक नाबालिकाको क्रूर हत्या भएको हो ।
स्थानीय मनहरी ढकालको घरमा कोठा भाडामा बस्दै आएका ३० वर्षीय सालिग्राम लुइँटेलले बालिकाको हत्या गरेको इलाका प्रहरी कार्यालय इटहरीले पुष्टि गरेको छ । सालिग्रामले आफ्नै भतिजी डेढ वर्षीया आइन्सु लुइँटेलको घाँटी र टाउकोमा ब्लेडले चिरेर हत्या गेको इटहरी प्रहरीले जनाएको छ ।
‘आफ्नै भतिजीको हत्या गरेको खबर आएपछि हामी घटनास्थलमा पुगेका थियौँ,’ एक प्रहरी अधिकृतले भने, ‘प्रहरीलाई ३ः४० बजेतिर मात्रै खबर आएको थियो । हामीले प्रारम्भिक अनुसन्धान गर्दा ती व्यक्ति मृतक बालिकाका आफ्नै काका रहेछन् ।’
घटनास्थलबाट ब्लेडसहित सालिग्रामलाई प्रहरीले नियन्त्रणमा लिएको जनाएको छ । सालिग्राम केही वर्षअघिदेखि डिप्रेसनको औषधि सेवन गरिरहेको र मानसिक रोगीजस्तो रहेको प्रहरीको प्रारम्भिक अनुसन्धानबाट खुलेको छ ।
‘उनी (सालिग्राम)दुई, तीन वर्षअघि घरको छतबाट हाम्फालेर ढाड पनि भाँचिएको प्रारम्भिक अनुसन्धानबाट खुलेको छ,’ ती प्रहरी अधिकृतले टाकुरा न्यूजसँग भने, ‘अहिले डिप्रेसनको औषधि सेवन गरेको पनि खुलेको छ । भर्खरैको घटना भएका कारण थप अनुसन्धान गर्न पाएका छैनौँ ।’
उनका अनुसार मृतक बालिकाका बुबा नवराज लुइँटेल वैदेशिक रोजगारीमा छन् । यहाँ बुबाआमासहित, भाउजू र भतिजीसँग बस्दै आएका सालिग्रामको साथबाट प्रहरीले तत्काल ब्लेड बरामद गरेको थियो ।
‘तत्कालको परिस्थिति हेर्दा ब्लेडले नै घाँटी र टाउकोमा काटेको देखिन्छ,’ ती प्रहरी भन्छन्, ‘घटनास्थलबाट पनि ब्लेड नै बरामद गरिएका कारण तत्काल ब्लेडकै कारण घटना भएको हो भन्न सकिन्छ । थप अनुसन्धान भने जारी छ ।’
मृतक बालिकाको शव पोस्टमार्टमका लागि धरानस्थित वीपी कोइराला स्वास्थ्य विज्ञान प्रतिष्ठान पठाएर घटनाबारे थप अनुसन्धान शुरू गरिएको इटहरी प्रहरीले जनाएको छ । प्रहरीले विभिन्न कोणबाट अनुसन्धान जारी राखेको जनाएको छ ।
Discussion about this post