मोरङ : जिल्ला कारागार मोरङमा रहेका एक कैदीको मृत्यु भएको छ।
बेलबारी नगरपालिका–४ घर भएका ३४ वर्षीय मनीकुमार तामाङको आइतबार (आज) विराटनगरस्थित कोशी अस्पतालमा उपचारका क्रममा मृत्यु भएको हो ।
मोरङ कारागार प्रशासनका अनुसार बिरामी परेका तामाङलाई भदौ २० गते साँझ उपचारका लागि अस्पताल भर्ना गरिएको थियो। उपचाररत अवस्थामै उनको मृत्यु भएको कारागारका जेलर चेतराज बरालले पुष्टि गरे ।
खुट्टा सुन्निने र मुटु सम्बन्धी पुरानै समस्या रहेका तामाङको उपचारका क्रममा आइतबार पौन १२ बजेतिर मृत्यु भएको बरालले बताए।
मोटरसाइकल चोरीमा संलग्न तामाङविरुद्ध विभिन्न पाँच अदालतमा चोरी मुद्दा दर्ता भएको थियो । उनको मोरङ, झापा, सुनसरी, इलाम र धनकुटामा मुद्दा रहेको थियो भने सबै मुद्दा विचाराधीन रहेका थिए।
मोरङमा तामाङविरुद्ध चोरी कसुरमा दुई वटा मुद्दा चलेका छन्। एउटा मुद्दामा मोरङ अदालतले ४ महिना कैद र १५ हजार रुपैयाँ जरिवाना फैसला गरेको थियो। अर्को मुद्दामा एक लाख रुपैयाँ धरौटी माग गरेको थियो।
धरौटीबापतको रकम बुझाउन नसकेपछि अदालतको आदेशबाट २०८० माघ २१ गते पुर्पक्षका लागि कारागार चलान गरिएको थियो। चोरी मुद्दामै उनीसँग धनकुटा अदालतबाट धरौटीबापत तीन लाख ५० हजार र सुनसरी अदालतबाट दुई लाख रूपैयाँ माग भएको थियो।
मोरङ कारागारमा हाल चार नाबालक र ९७ महिलासहित एक हजार ५९ जना कैदीबन्दी रहेका छन् ।
Discussion about this post