विराटनगर : विराटनगर विद्यालय नाटक महोत्सवको सातौँं दिन शुक्रबार ‘जिम्मेवारी कसको ?’ मञ्चन भएको छ ।
हाटखोलास्थित गुरुकुलको बालकृष्ण पोखरेल नाटकघरमा नमुना विद्या मन्दिरले नाटक मञ्चन गरेको हो ।
शिक्षक पशुपति रिमालद्धारा लिखित तथा निर्देशित उक्त नाटकले वर्तमान अवस्थाका बालबालिकालाई के कस्ता पक्षले प्रभाव पारिरहेको छ र बालबालिकालाई सक्षम बनाउन कसले कस्तो भूमिका खेल्नुपर्छ भनी खोजी गर्ने प्रयास गरेको थियो ।
नाटकमा आरोग्य अर्जेल, आयन गौतम, नवम चौधरी, अधिक्षा पौड्याल, समृद्धि सुन्यैउरी, जिया प्याकुरेल लगायतले अभिनय गरेका थिए ।
आरोहण गुरुकुल विराटनगरको आयोजनामा भदौ २२ गतेदेखि सुरु भएको महोत्सवमा विराटनगर, विराटचौक, बेलबारी, रङ्गेलीबाट ९ विद्यालयहरुले दैनिक एउटा नाटक मञ्चन गर्दैछन् ।
शनिबार मोरङ ज्ञानोदय सेकेण्डरी इङ्लिस स्कुलले स्मार्ट बन्द, आइतबार सुबिजिमुर मेमोरियल सेकेण्डरी स्कुलले ‘ज्ञ’ र अन्तिम श्री एकता सेकेण्डरी स्कुलले ‘साबित्रीको बाख्रो’ मञ्चन गर्नेछ ।
महोत्सवमा उत्कृष्ट नाटक, उत्कृष्ट लेखक, उत्कृष्ट निर्देशक, उत्कृष्ट अभिनेता तथा अभिनेत्रीलाई अवार्डको व्यवस्था गरिएको छ ।
Discussion about this post