मोरङ : मोरङमा ज्वाइँले ससुराको हत्या गरेका छन् । पथरीशनिश्चरे नगरपालिका–७ स्थितमा आफ्नै घरभित्र शनिबार (आज) बिहान ६० वर्षीय चन्द्रबहादुर तामाङको हत्या गरेको अवस्थामा शव फेला परेको थियो ।
इलाका प्रहरी कार्यालय पथरीका डीएसपी मोहनविक्रम दाहालकाअनुसार आफ्नै घरको प्यासेजमा रगतमा डुबिरहेको अवस्थामा चन्द्रबहादुरको शव फेला परेको हो ।
मृतकको टाउको र चिउँडोलगायत शरीरका विभिन्न भागमा धारिलो हतियारले प्रहार गरेको प्रारम्भिक अनुसन्धानबाट खुलेको छ ।
घटनास्थलबाट धारिलो हतियार खुर्पा बरामद गरिएको प्रहरीको भनाइ छ । आफ्नै घरभित्र चन्द्रबहादुरको बीभत्स शव फेला परेपनि उनका ज्वाईं (छोरीका श्रीमान) अन्दाजी २५ वर्षीय रविन राई फरार छन् ।
ससुराको हत्या गरेर उनी भागेको हुनसक्ने प्रहरीको भनाइ छ । प्रहरीले रविनको खोजी तीव्र पारेको जनाएको छ । रविन ससुराली घरमा बस्दै आएको खुलेको छ । घरमा ज्वाईं ससुरा मात्रै बस्दै आएको प्रहरीको भनाइ छ ।
‘ज्वाईं र ससुराले सधैं मदिरा सेवन गरेर होहल्ला गर्ने गरेको छिमेकीले बताएका छन्,’ डीएसपी दाहालले भने, ‘मदिरा सेवनपछि विवाद हुँदा हत्या भएको हुनसक्छ ।’
कानुनी प्रक्रिया पूरा गरेर घटनस्थलबाट शवलाई पोस्टमार्टमका लागि धरानस्थित वीपी कोइराला स्वास्थ्य विज्ञान प्रतिष्ठान लगेर घटनाबारे थप अनुसन्धान भइरहेको प्रहरीको भनाइ छ ।
Discussion about this post