इटहरी (डेस्क) : उदयपुरमा कार र मोटरसाइकल एकापसमा दुर्घटना हुँदा एक पुरुषको मृत्यु भएको छ ।
चौदण्डीगढी नगरपालिका वडा नं. ६ स्थित मदन भण्डारी राजमार्गको सशस्त्र क्याम्प अगाडि गाईघाटबाट रामपुरतर्फ आउँदै गरेको बाग्मती प्रदेश ०१-०२६ च ५०६२ नम्बरको कारमा बेल्टारबाट गाईघाटतर्फ आउँदै गरेको प्रदेश १-०५-००१ प ८८४९ नम्बरको मोटरसाइकल एकापसमा दुर्घटना भएको हो ।
दुर्घटनामा चौदण्डीगढी २ माडीबास बस्ने ४३ वर्षीय तिलक राईको मृत्यु भएको कोशी प्रदेश प्रहरी कार्यालय विराटनगरले जनाएको छ ।
मोटरसाइकल चालक रहेका उनी घटनामा गम्भीर घाइते थिए । उपचारको लागि नगर अस्पताल बेल्टार पठाइएको र उपचारको क्रममा मृत्यु भएको प्रहरीको भनाइ छ । मोटरसाइकल पछाडि सवार ३१ वर्षीय शरण राई घाइते भएका छन् ।
उनलाई थप उपचारका लागि धरानस्थित वीपी कोइराला स्वास्थ्य विज्ञान प्रतिष्ठान ल्याइएको छ ।
कार र कार चालक नुवाकोट बेलकोटगढी नगरपालिका ३ बस्ने ५६ वर्षीय बासुदेव सापकोटालाई प्रहरीले नियन्त्रणमा लिएको छ ।
घुमाउरो सडकका कारण दुर्घटना भएको प्रहरीले जनाएको छ । घटनाबारे थप अनुसन्धान भइरहेको प्रहरीको भनाइ छ ।
Discussion about this post