इटहरी : मोरङको ग्रामथान गाउँपालिका अध्यक्षको उम्मेदवारमा नेपाली कांग्रेस र नेकपा माओबादी केन्द्रले टुंग्याएको छ ।
कांग्रेसले अध्यक्षको उम्मेदवारमा बलराम सरदारलाई अगाडि सारेको छ । कांग्रेस मोरङ संसदीय समितिको बिहीबार बसेको बैठकले पालिकाको अध्यक्षमा सरदारलाई उम्मेदवार बनाउने निर्णय गरेको पार्टीका जिल्ला उपसभापति भक्तिनाथ माझीले जानकारी दिए ।
पार्टीका पूर्वमहासमिति सदस्य एवं कांग्रेस मोरङको सल्लाहकारसमेत रहेका सरदार आगामी मंसिर १६ गते हुने उपनिर्वाचनमा अध्यक्षको उम्मेदवार बन्ने पक्का भएको हो ।
टिकटको टुंगो लगाउन कांग्रेस मोरङका सभापति डिगबहादुर लिम्बूको संयोजकत्वमा १३ सदस्यीय संसदीय समिति बनाइएको थियो ।
अध्यक्षका १३ जना आकांक्षीमध्ये सरदारलाई टिकट दिने निर्णय समितिको बैठकमा भएको माझीले बताए ।
यसैगरी यसअघि नै नेकपा (माओवादी केन्द्र)ले ग्रामथानको अध्यक्षमा पूर्व वडाध्यक्ष नमोनारायण माझीलाई उम्मेदवार बनाउने निर्णय गरेको छ ।
माझी यसअघि कांग्रेस छाडेर माओवादी प्रवेश गरेका हुन् । नेकपा (एमाले) ले भने उम्मेदवारको टुंगो लगाइसकेको छैन ।
२०७९ सालको स्थानीय तह निर्वाचनमा नेपाली कांग्रेसका जयप्रकाश गच्छदार ग्रामथानको अध्यक्ष निर्वाचित भएका थिए । उनी राष्ट्रियसभाको निर्वाचनताका मत हाल्न विराटनगर गएकोबेला अचानक बेहोस भएर ढलेका थिए ।
उनको उपचारको क्रममा गत असार ३ गते निधन भएको थियो । गच्छदारको निधनपछि ग्रामथानमा उपनिर्वाचन हुने भएको हो ।
उपनिर्वाचन नजिकिएसँगै मत आफ्नो पक्षमा पार्नका निम्ति दलहरू रस्साकस्सी गरिरहेका छन् ।
Discussion about this post