कोशी प्रदेशमा १५ दिनभित्र ‘टाइम कार्ड’ लागू गरिने

इटहरी : कोशी प्रदेशमा १५ दिनभित्रमा ‘टाइम कार्ड’ लागू गर्ने निर्णय भएको छ । केही दिनयता धेरै सवारी दुर्घटना भएपछि ‘टाइम कार्ड’ लागू गरिने भएको हो ।

सोमबार (आज) इटहरी उपमहानगरपालिकामा मेयर हेमकर्ण पौडेलसहित सुनसरीका प्रुमख जिल्ला अधिकारी रामचन्द्र तिवारी, प्रहरी प्रमुख, एसपी सुमन तिम्सिना, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका एसपी विनोद घिमिरे, जनप्रतिनिधिहरू, सडक विभागका प्रतिनिधि, यातायात व्यवसायी संघ, सरोकारवाला निकायसहितको बैठकले ‘टाइम कार्ड’ लागू गर्ने निर्णय भएको हो ।

‘टाइम कार्ड’ लागू गरेपछि सवारी साधनको ‘स्पीड’ कम हुने र दुर्घटना न्यूनीकरण हुने विश्वास गरिएको इटहरीका मेयर हेमकर्ण पौडेलले जानकारी दिए । ‘१५ दिनभित्रमा टाइम कार्ड लागू गर्ने र अतिक्रमित क्षेत्रका सडक, पेटी क्लियर गर्ने निर्णय भएको छ,’ उनले भने, ‘ट्राफिक व्यवस्थापन चुस्त, दुरुस्त बनाउन पनि सबै सरोकारवाला निकाय गम्भीर भएका छौँ, सोहीअनुसार निर्णय भएको छ ।’

सडकलाई अनुशासित र क्षति न्यूनीकरणको पाटोमा सबै सचेत हुनुपर्ने उनले बताए । ट्राफिक व्यवस्थापनमा देखिएका कमजोरीलाई सुधार गरेर लैजानुपर्ने मेयर पौडेलले बताए ।

सुनसरीका प्रमुख जिल्ला अधिकारी तिवारीले दोषी कोही पनि नउम्किने बताए । ‘लापरबाहीपूर्वक गाडी चलाउने र दोषी जो कोही पनि कारबाहीको भागिदार हुन्छ,’ उनले भने, ‘हामी आफैँ ट्राफिक नियमबारे शिक्षित हुन जरूरी छ । अब टाइम कार्ड लागू भएपछि धेरै हदसम्म दुर्घटना न्यूनीकरण हुने विश्वास गरिएको छ ।’

प्रजिअ तिवारीले सडक दुर्घटना भोलिका दिनमा पनि हुने भएकाले आगलागी गर्नु र उत्तेजित हुनु अस्वभाविक रहेको बताए । ‘यो मेरो पनि समाज हो । दुर्घटना हुन नदिऔँ, तर दुर्घटना भएमा आगो नै लगाउनुपर्छ भन्ने भाष्य परिवर्तन गर्न आवश्यक छ,’ उनले भने, ‘हामीले समाज भाँड्ने होइन, बनाउने हो ।’

आइतबार काकडभिट्टाबाट विराटनगरतर्फ जाँदै गरेको मे १ ख ७५७४ नम्बरको नागरिक यातायातको ठक्करबाट इटहरी १० की सजना यादवको मृत्यु भएको थियो । दुर्घटनापछि आक्रोशित स्थानीयबासीले बस जलाएका थिए । बस पूर्ण रूपमा जलेको छ भने राति ८ बजेसम्म आक्रोशित स्थानीयले प्रदर्शन गरेका थिए ।

खासगरी विद्यालयबाट घर फर्किदैँ गरेकी यादवलाई बस चालकले ठक्कर दिएको र ब्याक गरेर किचेर मारेको प्रत्यक्षदर्शीले बताएका छन् । घटनापछि उग्ररूप लिएको थियो ।

सोही विषयसँगै दुर्घटना न्यूनीकरण कसरी गर्न सकिन्छ भन्नेबारे उपमहानगरमा बैठक बसिएको हो ।