विराटनगर : नेपाली क्रिकेटले विश्वव्यापी रूपमा उत्कृष्ट र राम्रो छवि बनाएको कोशी प्रदेशका मुख्यमन्त्री हिक्मत कार्कीले बताएका छन् ।
मंगलबार साँझ विराटनगर किंग्सको जर्सी अनावरण तथा गीत सार्वजनिकीकरण कार्यक्रममा बोल्दै मुख्यमन्त्री कार्कीले क्रिकेटबाट नेपालको विश्वमा पहिचान बनाउन सफल भएकोमा खुशी व्यक्त गरे ।
उनले खेलाडीसहित प्रशिक्षक र व्यवस्थापक सबै पक्ष नेपालको सफलताको लागि बधाईको हिस्सेदार रहेकोसमेत बताए ।
उनले विराटनगर किंग्स नेपालको सम्राट भएर विश्वमै परिचय दिनेमा विश्वास व्यक्त गरे । खेलकुदको विकासमा आफ्नो क्षमताभित्र रहेर सँधै साथ दिनेसमेत उनले प्रतिबद्धता जनाए ।
मुख्यमन्त्री कार्कीले भने, ‘के कस्तो सहयोग गर्नुपर्छ आफ्नो क्षमताभित्र रहेर गर्ने प्रतिबद्धता व्यक्त गर्न पाउँदा मलाई हर्षको अनुभूति भएको छ ।’
नेपालको खेलकुदमा क्रिकेटप्रति चासो बढेको भएपनि सरकारले क्रिकेटको विकासमा यथोचित सहयोग गर्न नसकिरहेको उनले बताए । भने, ‘क्रिकेटका सबै संरचनाहरू बनाउन म सम्माननीय प्रधानमन्त्रीलाई आग्रह गर्न चहान्छु ।’
उनले कीर्तिपुरको रंगाशाला समयमै पूर्णता पाउने र देशभर नै खेलकुदका संरचना बन्ने विश्वास व्यक्त गरे । उनले क्रिकेटका संरचनाहरू बनाउन कोशी प्रदेश सरकार र पूर्वाञ्चल विश्वविद्यालयसँगको सहकार्यमा काम गर्ने बताए ।
‘कोशीको सान हाम्रो पहिचान’ भन्ने सन्देशसहित नेपाल प्रिमियर लिगमा कोशी प्रदेशको प्रतिनिधित्व विराटनगर किंग्सले गर्नेछ ।
कार्यक्रममा कोशी प्रदेशका सामाजिक विकास मन्त्री पाँचकर्ण राई, विराटनगर महानगरपालिकाका मेयर नागेश कोइराला, कोशी प्रदेशका प्रमुख सचिव केदार शर्मा, क्रिकेटर सन्दीप लामिछानेलगायत सहभागी थिए ।
Discussion about this post