इटहरी : पूर्वका नौ जिल्लामा यातायात बन्दका कारण जनजीवन प्रभावित बनेको छ ।
ताप्लेजुङको पाथिभरामा केबलकार बनाउन नहुने माग राख्दै सुनसरी, मोरङ, झापा, इलाम, पाँचथर, ताप्लेजुङ, धनकुटा, तेह्रथुम र संखुवासभामा यातायात बन्द गरिएको हो । बन्दको प्रभावका कारण जनजीवन प्रभावित बनेको छ ।
यी जिल्लामा आज र भोलि यातायात बन्द गर्न आह्वान भएसँगै बन्दको प्रभाव परेको हो ।
मुक्कुमलुङ संरक्षण र केबलकार खारेजी संघर्षरत सम्पूर्ण संस्था एवम् राजनीतिक दलहरूले बन्द गरेका हुन् ।
केबलकार निर्माणका विपक्षमा केबलकार निर्माण खारेजी समिति, मुक्कुमलुङ संयुक्त संघर्ष समिति, प्रदेश १ पुनः नामांकन संयुक्त संघर्ष समिति, किराँत धर्म तथा साहित्य उत्थान संघ, पहिचानका लागि युवा जिल्ला समिति र किराँत याक्थुङ चुम्लुङ जिल्ला समितिलगायत संघसंस्था उभिएका छन् ।
केबलकार खारेजी संयुक्त संरक्षण समितिका संयोजक खगेन्द्र फेम्बूले राज्य सत्ताको हस्तक्षेप बढेको बताए ।
उनले आफूहरूलाई बन्दहडताल गर्न मन नभए पनि राज्य सत्ताको ज्यादतीविरुद्ध बन्द गर्न बाध्य भएको बताए ।
‘हामीमाथि जहिल्यै पनि हस्तक्षेप भएको छ । राज्यले जहिल्यै बाध्यात्मक अवस्था सिर्जना गर्ने र शान्तिपूर्ण विरोध गर्दा दमन भएको छ,’ उनले भने, ‘सरकार निरंकुश भयो । अब यातायात बन्दसँगै सशक्त रूपमा आन्दोलन अगाडि बढ्छ ।’
सरकारले यस क्षेत्रमा केबलकार बनाउने निर्णय फिर्ता लिनुपर्ने बताए । अन्यथा केबलकार निर्माण नहटेसम्म निरन्तर आन्दोलन जारी रहने चेतावनी उनले दिए ।
सांस्कृतिक आस्थाको धरोहरमाथि हस्तक्षेप भएकाले ०७४ सालदेखि नै आफूहरूले विरोध जनाउँदै आएको उनले फेम्बूले बताए ।
स्थानीयको चाहनाविपरीत राज्यसत्ताले प्रहरी, प्रशासनको दुरुपयोग गरेको फेम्बूको आरोप छ ।
Discussion about this post