इटहरी : इटहरीमा जारी स्व. कृष्णप्रसाद भट्टराई स्मृति गोल्डकपको आज (बिहीबार) फाइनल खेल हुँदैछ ।
इटहरी ५ स्थित जनता बहुमुखी क्याम्पसको खेल मैदानमा दिउँसो २ बजेदेखि फाइनल खेल हुने आयोजक द योङ ब्रदर्श क्लबले जनाएको छ ।
सोमबार भएको पहिलो सेमिफाइनल खेलमा दमक एकेडेमी झापालाई सडन डेथमा पराजित गर्दै लोहोरुङ फुटबल क्लब संखुवासभा फाइनलमा प्रवेश गरेको थियो ।
मंगलबार भएको अन्तिम सेमिफाइनल खेलमा केराबारीले सिंहदेवीलाई १–० गोल अन्तरले पराजित गर्दै फाइनलका लागि सिट सुरक्षित गरेको हो । यससँगै आज उपाधि चुम्नका लागि लोहोरुङ र केराबारीबीच प्रतिस्पर्धा हुनेछ ।
प्रतिस्पर्धाका लागि दुवै टिम तयारीमा छन् । यसअघि लोहोरुङले क्वाटरफाइनल खेलमा चारतारे फुटबल क्लब लेटाङसँग प्रतिस्पर्धा गरेको थियो ।
केराबारीले भने आयोजक द योङ ब्रदर्श क्लबलाई पराजित गरेको थियो । दुई–दुई वटा खेल खेलेका दुवै टिमले उपाधि चुम्ने लक्ष्य लिएका छन् ।
आयोजक द योङ ब्रदर्श क्लबका अध्यक्ष विजय सुब्बाका अनुसार प्रतियोगिताको विजेता टिमले नगद दुई लाख ५० हजार प्राप्त गर्नेछ । उपविजेता टिमले नगद एक लाख ३० हजारमा चित्त बुझाउनेछ ।
अघिल्लो वर्ष विजेतालाई दुई लाख २२ हजार प्रदान गरिएको थियो भने उपविजेताले एक लाख ११ हजार रुपैयाँ प्राप्त गरेका थिए । तर, यस वर्ष पुरस्कार राशि बढाइएको उनले बताए ।
प्रतियोगितामा हरेक खेलको म्यान अफ दि म्याच हुने खेलाडीले नगद पाँच हजार प्राप्त गर्नेछन् ।
विधागततर्फ सर्वोत्कृष्ट खेलाडीलाई नगद १० हजार, उत्कृष्ट गोलरक्षकलाई नगद १० हजार, उत्कृष्ट डिफेन्डरलाई नगद १० हजार, उत्कृष्ट मिड फिल्डरलाई नगद १० हजार, उत्कृष्ट स्ट्राइकरलाई नगद १० हजार र सर्वाधिक गोलकर्ता खेलाडीलाई नगद १० हजारसहित ट्रफी र मेडलसहित प्रमाणपत्र वितरण गरिने खेल संयोजक एवम् क्लबका संरक्षक विकास केसीले जानकारी दिए ।
प्रतियोगितामा २२ लाख ५५ हजार रुपैयाँ खर्च हुने अनुमान गरिएको उनले जनाए ।
Discussion about this post