इटहरी : नेपाल तरुण दल इटहरीमा देखिएको विवादको विषयमा नेताहरूले चिन्ता व्यक्त गर्दै समाधानको उपाय निकाल्न शीर्ष नेतृत्वलाई आग्रह गरेका छन् ।
मंगलबार इटहरीस्थित एक कार्यक्रमको आयोजना गर्दै नेता तथा कार्यकर्ताहरूले इटहरीमा देखिएको तरुण दलको विवादलाई तत्कालै समाधान गर्नुपर्ने बताएका छन् ।
केही दिनअघि तरुण दल सुनसरीले हस्तक्षेप गरी नगर कार्यसमिति अवैधानिक किसिमबाट चयन गरेको भन्दै नेताहरूले आपत्ति जनाएका हुन् ।
नगर समिति रहेकै अवस्थामा नगर समितिलाई नै जानकारी नदिइकन जिल्ला समितिले नगर समिति पुनः चयन गरेको थियो । यसबारे मंगलबार तरुण दल इटहरीका सभापति विष्णु खत्रीको अध्यक्षतामा अन्तरक्रिया कार्यक्रम आयोजना गरिएको छ ।
जसमा पूर्व मन्त्री एवम् कांग्रेस सुनसरीका पूर्व सभापति सीताराम मेहता प्रमुख अतिथिका रूपमा सहभागी थिए ।
कांग्रेस सुनसरीका सचिव वीरेन्द्र साह, सुनसरी क्षेत्र नं. २ का निवर्तमान सभापति मणिराम श्रेष्ठ, इटहरी उपमहानगरपालिकाका सभापति एवम् मेयर हेमकर्ण पौडेल, महाधिवेशन प्रतिनिधि एवम् नेविसंघका पूर्व केन्द्रीय उपाध्यक्ष विकास केसी, सुनसरी क्षेत्र नं. २ (क)का सभापति सुबेक्छु देवानलगायतले बोल्दै वर्तमान कार्यसमिति रहेकै अवस्थामा हस्तक्षेप गरी नयाँ नेतृत्व चयन हुनु अवैधानिक र नीतिगत नरहेको टिप्पणी गरे ।
‘अबका दिनमा पार्टीलाई विधिसम्बत चलाउने कुरामा, पद्दतिको कुरामा, पार्टीलाई एक बनाउने कुरामा सबै एकजुट हुनुपर्छ,’ मेयरसमेत रहेका इटहरी कांग्रेसका सभापति पौडेलले भने, ‘अब व्यक्तिबीचको गुट होइन, वैचारिक र रचनात्मक गुट बनाउनुपर्छ । हामीले इटहरीको कांग्रेसलाई गुटरहित बनाउन र एकजुट हुनमा सबैलाई आग्रह गर्छु ।’
उनले तरुण दलभित्र एकता बनाउन आफूले भूमिका खेल्ने बताए । अहिले भइरहेको विवादको समाधानका निम्ति आफूले पहल गर्ने उनले आश्वासन दिलाए ।
महाधिवेशन प्रतिनिधि एवम् नेविसंघका पूर्व केन्द्रीय उपाध्यक्ष केसीले कोही एक व्यक्तिका कारण आज तरुण दल नै बदनाम भइरहेको बताए ।
‘कुनै बेला तरुण दल भन्नेबित्तिकै भ्रष्टाचारीहरू डराउने अवस्था हुन्थ्यो । सकारात्मक काममा तरुण दल सधैँ एक हुन्थ्यो,’ उनले भने, ‘आज तरुण दल भन्नेबित्तिकै बजार आतङ्कित हुने अवस्था सिर्जना भएको छ । अहिले जसरी तरुण दल इटहरीमा अवैधानिक ढंगबाट नेतृत्व चयन गरिएको कुरा आइरहेको छ, यसले पनि पछिल्लो दृष्टान्त प्रस्तुत गर्छ ।’
उनले तरुण दल इटहरीको विद्यमान कार्यसमिति हुँदाहुँदै जिल्लाले थाहै नदिईकन हस्तक्षेप गरेकोमा असन्तुष्टि व्यक्त गरे ।
कार्यक्रमका प्रमुख अतिथि मेहताले तरुण दल कांग्रेसको भातृ संस्था रहेको उदृत गर्दै पार्टीलाई एकजुट बनाउनुपर्ने र यसमा सबैजना सचेत हुनुपर्ने बताए ।
पार्टीमा कोही मानिसको व्यक्तिगत चाहनाले जित्न नहुने र विधि, पद्दतिले जित्नुपर्ने मेहताको भनाइ थियो ।
यसअघि गत ८ वैशाखमा सामाजिक सञ्जाल फेसबुकमार्फत नेपाल तरुण दल इटहरी उपमहानगर समिति गठन भएको सार्वजनिक भएको थियो ।
तरुण दल इटहरीका सभापति विष्णु खत्री र सचिव बादल दाहालले भने एक विज्ञप्ति जारी गरी विधानविपरीत समिति गठन गरिएको भन्दै आपत्ति जनाए ।
‘कुनै पनि सूचना नदिइकन तरुण दलको विधानविपरीत नगर समितिको अधिकारमाथि हस्तक्षेप गर्नु अवैधानिक हो,’ विज्ञप्तिमा भनिएको थियो, ‘यस विषयमा नेपाल तरुण दल इटहरी उपमहानगर समितिको गम्भीर ध्यानाकर्षण भएको छ ।’
सार्वजनिक भएको नामअनुसार इटहरी–९ का गोरे भनिने अनिष सुवेदीको अध्यक्षतामा नयाँ कार्यसमिति घोषणा गरेका हुन् । तर, सुवेदीको अध्यक्षतामा भएको समिति अवैधानिक रहेको कांग्रेस इटहरीले जनाएको छ ।
भिडिओ
Discussion about this post