इटहरी : सप्तकोशी नदीमा उद्धार अभ्यासका क्रममा बेपत्ता भएका सशस्त्र प्रहरी बलका दुईजना गोताखोरको खोजीका लागि चितवनको कुरिन्टारस्थित सशस्त्र प्रहरी बल विपद् उद्धार तालिम शिक्षालयबाट पाँच सदस्यीय गोताखोर टोली परिचालन गरिएको छ।
सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार उक्त टोलीलाई अनुभवी प्रशिक्षक तथा डीएसपी पुरुषोत्तम भण्डारीको नेतृत्वमा खटाइएको हो।
टोली बिहीबार राति पौने ११ बजे सशस्त्र प्रहरी बल विपद् उद्दार तालिम शिक्षालय कुरिन्टार, चितवनबाट घटनास्थलतर्फ प्रस्थान गरेको हो।
बिहीबार दिउँसो उद्धार अभ्यासका क्रममा इलाम दरबन्दी भई कार्यरत सशस्त्र जवान हरिदेव राजवंशी र पर्सा गणअन्तर्गत छिन्नमस्ता बाहिनीमा कार्यरत जवान सुरज साउद सप्तकोशीमा बेपत्ता भएका थिए।
उनीहरूको खोजी तथा उद्धार कार्य अझै जारी छ। घटनास्थलमा पानीको बहाव तीव्र रहेको र खोजी कार्य जटिल बन्दै गएको बताइएको छ।
सप्तकोशी जस्तो ठूलो तथा गहिरो नदीमा उद्धार कार्य निकै चुनौतीपूर्ण हुने सुरक्षा स्रोतको भनाइ छ। सशस्त्र प्रहरी बलका अनुसार उद्धार टोलीले उच्च सतर्कता र रणनीतिक रूपमा काम गरिरहेको छ।
Discussion about this post