विराटनगर : कोशी प्रदेश प्रहरी कार्यालय, विराटनगरले इलाका प्रहरी कार्यालय हरैँचामा कार्यरत प्रहरी नायव निरीक्षक (सई) निरबहादुर खड्कालाई जेठ महिनाको ‘सर्वोत्कृष्ट प्रहरी’ घोषित गरेको छ।
प्रहरी कार्यालयका अनुसार खड्काले विभागीय मूल्य–मान्यता, आदेश–निर्देशनको पूर्ण पालना गर्दै उच्च मनोबल, प्रतिबद्धता र साहसका साथ कर्तव्य निर्वाह गरेका आधारमा उनलाई उक्त सम्मान प्रदान गरिएको हो।
जेठ २० गते मोरङको ग्रामथान गाउँपालिका–७ बाट बेवारिसे अवस्थामा रहेको टाटा सुमोमा शंका लागी गरिएको चेकजाँचका क्रममा सई खड्काको टोलीले २ जना व्यक्तिसहित ३ सय ४७ किलो ११० ग्राम गाँजा बरामद गर्न सफल भएको थियो।
साथै, कर्तव्य ज्यान मुद्दामा ५ वर्ष कैद सजाय पाएका फरार अभियुक्तसहित २० लाख ८२ हजार ८ सय रुपैयाँ जरिवाना तोकिएका १४ जना फरार प्रतिवादीहरूलाई पनि कानुनी दायरामा ल्याउन उनले सफलता हासिल गरेका थिए।
त्यसैगरी, जेठ २४ गतेदेखि हराएकी ग्रामथान–७ की ८९ वर्षीया तिलमाया खड्काको खोजतलासका क्रममा उनी ग्रामथान–६ स्थित सुनसरी–मोरङ सिचाइ परियोजनाको नहरमा डुबेको अवस्थामा मृत फेला परेकी थिइन्।
प्रारम्भिक अनुसन्धानकै क्रममा मृतकले लगाएका सुनका गहना स्थानीय एक घरमा माटोमुनि गाडिएको अवस्थामा फेला परेको थियो ।
घटनासँग सम्बन्धित शंकास्पद व्यक्तिलाई नियन्त्रणमा लिई थप अनुसन्धान अघि बढाइएको छ।
प्रहरी नायव निरीक्षक खड्काको सक्रियता, अनुसन्धान क्षमता र कानुनी प्रक्रियामा देखिएको प्रतिबद्धता अत्यन्तै प्रशंसनीय रहेको कोशी प्रदेश प्रहरी कार्यालयले जनाएको छ।
Discussion about this post