तरहरा : इटहरी २० तरहरामा भएको स्व. एलिस पाण्डे स्मृति अन्तरविद्यालय फुटसल प्रतियोगिताको उपाधि आयोजक प्याराडाइस बोर्डिङ स्कुलले चुमेको छ । सोमबार उद्घाटन भएको खेलको मंगलबार फाइनल खेल भएको हो ।
प्रतियोगिताको फाइनल खेलमा प्याराडाइसले सयपत्री शिशु सदनलाई ४-२ गोल अन्तरले पराजित गर्दै विजयी भएको हो ।
प्रतियोगिताको विजेता टिम प्याराडाइसलाई नगद २० हजारसहित ट्रफी, मेडल र प्रमाणपत्र प्रदान गरियो । यसैगरी उपविजेता बनेको सयपत्रीले १० हजारमा चित्त बुझायो ।
साथै, प्रतियोगितामा सयपत्रीका पर्वत राई उत्कृष्ट खेलाडी, प्याराडाइसका इशान कटवाल उत्कृष्ट गोलरक्षक र प्याराडाइसकै शिशिर राई उदयीमान खेलाडी घोषित हुँदै जनही नगद दुई हजार रुपैयाँ प्राप्त गरे ।
खेलाडीहरूलाई प्याराडाइस बोर्डिङ स्कुलका संस्थापक दिलकुमार वन र इटहरी २० का वडाध्यक्ष मणिराम श्रेष्ठलगायतले पुरस्कृत गरे ।
प्रतियोगितामा इटहरीभरीका १६ वटा विद्यालय सहभागी भएको खेल संयोजक सन्तोष पुरी (सुशान्त)ले जानकारी दिए । उनकाअनुसार प्याराडाइस बोर्डिङको एसएलसी ब्याच २०७२ ले उक्त प्रतियोगिता आयोजना गरेको हो ।
खासगरी उक्त ब्याचका एलिस पाण्डेको स्मृतिमा प्रतियोगिता आयोजना गरिएको पुरीले बताए । साथीको स्मृतिमा फुटसलको माध्यमबाट स्मरण गरिएको उनको भनाइ छ ।
इटहरी १९ निवासी पाण्डेको ०७४ सालमा निधन भएको थियो । उनकै स्मृतिमा हरेक वर्ष प्रतियोगिता आयोजना गरिने कार्यक्रमका सभाध्यक्ष सविन घले गुरुङले बताए ।
गुरुङका अनुसार केही व्यक्तिहरूसँग र स्वयम् एसएलसी ब्याचबाट रकम संकलन गरी प्रतियोगिता आयोजना गरिएको हो ।
साथै, उक्त प्रतियोगिताको अवसर पारेर प्याराडाइस बोर्डिङका संस्थापक दिलकुमार वनलाई सम्मानसमेत गरियो । पूर्व विद्यार्थीहरूले दोसल्ला ओढाएर सम्मान पत्रले वनलाई सम्मान गरेका थिए ।
Discussion about this post