इटहरी : महामानव तथा नेपालका प्रथम जननिर्वाचित प्रधानमन्त्री विश्वेश्वरप्रसाद (बीपी) कोइरालाको ४३औं स्मृति दिवसको अवसरमा इटहरीमा आयोजित हाजिरीजवाफ प्रतियोगितामा राष्ट्रिय माध्यमिक विद्यालयले प्रथम स्थान हासिल गरेको छ ।
नेपाली कांग्रेस इटहरी उपमहानगर समितिद्वारा आयोजित प्रतियोगितामा विश्व आदर्श कलेज र एडुटेक कलेज क्रमशः द्धितीय र तृतीय भए ।
इटहरी उपमहानगरपालिका अन्तर्गतका १९ वटा विद्यालय सहभागी प्रतियोगितामा विजेता विद्यालयहरूलाई नगद पुरस्कारसहित सम्मान गरिएको छ ।
पहिलो स्थान हासिल गरेको राष्ट्रिय माविले १० हजार रुपैयाँ, दोस्रो स्थान प्राप्त विश्व आदर्शले ७ हजार रुपैयाँ र तेस्रो स्थान प्राप्त एडुटेक कलेजले ५ हजार रुपैयाँ नगद पुरस्कारसहित प्रमाणपत्र प्राप्त गरे ।
मंगलबार (आज) उद्योग वाणिज्य संघको सभाहलमा कांग्रेस इटहरीका कार्यवाहक सभापति कोबिदजंग कार्कीको सभाध्यक्षतामा कार्यक्रम सम्पन्न भएको हो ।
कार्यक्रममा कांग्रेस सुनसरीका उपसभापति नगेशचन्द्र राई, महाधिवेशन प्रतिनिधि विकास केसीलगायतले बोलेका थिए भने बीपी कोइरालाले गरेको योगदानबारे नाट्यकर्मी प्रज्वल पराजुलीले मन्तव्य राखेका थिए ।
नाट्यकर्मी एवम् कवि पराजुलीले बोल्दै बीपीलाई प्रथम जननिर्वाचित प्रधानमन्त्री भनेर मात्रै नपुग्ने र उनलाई आम मानिसले पढ्नुपर्ने बताए ।
बीपीले राष्ट्र, राष्ट्रियता, लोकतन्त्र र समाजवादप्रति अत्यन्तै ठूलो योगदान गरेको उनले उल्लेख गरे ।
‘बीपीले अनेकौं कथा, उपन्यास र निबन्ध लेख्नुभएको छ,’ पराजुलीले भने, ‘आज बीपीको भौतिक शरीर नरहेपनि उहाँका सिर्जनाका कारण सधैँ जीवित हुनुहुन्छ । बीपीलाई कांग्रेस, कम्युनिस्टले मात्रै होइन, प्रत्येक विद्यार्थीले पढ्नुपर्छ, प्रत्येक मानिसले पढ्नुपर्छ ।’
बीपीले नेपाली परिवेशमा समाजवादलाई लागू गर्ने सपना देखेको स्मरण गर्दै पराजुलीले बीपीको योगदानको चर्चा गरेर नै नसकिने उदृत गरे ।
खासगरी मंगलबार कांग्रेस सुनसरीले १२ जिल्लाका १२ वटै स्थानीय तहमा विविध कार्यक्रमको आयोजना गरी बीपीलाई स्मरण गरेको जनाएको छ ।
Discussion about this post